Imprimir

Mónica Martínez, a edil da Coruña que deixa Cs: "Seguirei traballando coa mesma ilusión"

Efe | 03 de junio de 2020

Mónica Martínez con Marta Rivera nun acto electoral de Cs en 2019. ARQUIVO
Mónica Martínez con Marta Rivera nun acto electoral de Cs en 2019. ARQUIVO
A que era a única concelleira do partido laranxa na corporación herculina seguirá nela "sen pertencer a ningún partido"

A decisión da única concelleira de Ciudadanos na Coruña, Mónica Martínez, de deixar o partido laranxa non sorprendeu as persoas que mellor a coñecen e seguen o seu día a día, e, aínda que a edil tivo clara esa idea hai meses, esperou o momento que, ao seu xuízo, fose máis adecuado para elixir a data na que facer o anuncio oficial da ruptura. Tras ela, seguirá como edil, "pero sen pertencer a ningún partido". 

O abandono de Cs si causou sorpresa fóra do ámbito da corporación municipal herculina e ao mesmo tempo recibiu numerosas adhesións dentro da mesma, xa que, tras un ano de lexislatura local, Martínez conseguiu desde o seu solitario escano axuntar alianzas variadas con todos os grupos municipais para sacar adiante varias mocións, algunhas delas por unanimidade.

A súa decisión persoal de apoiar os orzamentos dun goberno local socialista, que encabeza a primeira alcaldesa saída das urnas na Coruña, Inés Rey, en contra das indicacións do seu partido, deixárona sen auga na piscina ante o aparato oficial e pasou a ser vista como unha rebelde.

A alcaldesa agradece o labor de Martínez na corporación e valora a súa "oposición construtiva"

Meses máis tarde, logo da marcha de Albert Rivera tras unhas eleccións xerais —as de novembro de 2019— nas que Cs sufriu un desastre, Mónica Martínez postulouse co sector crítico de Cs que apoiou a Francisco Igea para dirixir o partido. Foi a corrente maioritaria en Galicia ao conseguir máis compromisarios que a liña oficialista que apostaba por Inés Arrimadas, o que serviu para facer ver que a edil non se sentía cómoda cos órganos de dirección que rexían e rexen no partido.

A edil, agora independente, recibiu presións para que deixase a acta en favor do seguinte da lista de Cs, pero mantena. "Seguirei traballando coa mesma ilusión e ganas, cos meus valores intactos, coa enerxía que me caracteriza e sempre, sempre, axudando. Coruña, a nosa cidade, merécese todo e máis", asegura a través da súa web oficial, a única manifestación pública que realizou desde que presentou a súa baixa como militante de Cs. 

A alcaldesa, Inés Rey, agradeceu este mércores "o labor que vén desenvolvendo Mónica Martínez na corporación, na que demostrou unha sobrada capacidade de traballo, porque fai unha oposición construtiva pensando na cidade". Ademais, a rexedora destacou o seu traballo desde o banco laranxa por ser "unha persoa seria, responsable, coa que se pode traballar e dialogar, coas lóxicas diferenzas ideolóxicas que pode haber, pero é unha persoa coa que é fácil chegar a acordos porque hai un diálogo fluído".

Puede ver este artículo en la siguitente dirección /articulo/galicia/monica-martinez-edil-da-coruna-deixa-cs-seguirei-traballando-coa-mesma-ilusion/20200603193538079145.html


© 2020 Galiciae

Fernando de Casa Novoa, 35 A 1ºB Santiago de Compostela

Tlfno: 981 55 25 30

(Grupo El Progreso)