Morre Neil Innes, o sétimo Monty Python, de forma inesperada aos 75 anos

O cómico e humorista colaborou coa mítica formación británica en sketches, películas e cancións. Foi cantante do grupo Rutless
Neil Innes. EP
photo_camera Neil Innes. EP

O cómico e músico británico Neil Innes, coñecido como o "sétimo" Monty Python polas súas asiduas colaboracións co grupo de cómicos, faleceu o pasado domingo de xeito inesperado aos 75 anos, segundo confirmou este luns o seu axente, Nigel Morton.

O guionista e cantante do grupo Rutless colaborou, en 1974, na serie final para televisión dos Python tras a marcha temporal de John Cleese.

Entre as súas contribucións para o popular grupo, Innes escribiu cancións para a cinta Os cabaleiros da mesa cadrada e os seus tolos seguidores, colaborou en A vida de Brian e participou na xira polo Reino Unido e Canadá.

Tras anunciar o seu falecemento con gran "tristeza", un portavoz da familia de Innes indicou este luns aos medios locais que o cómico non padecía ningunha enfermidade e que a súa morte fora inesperada.

"Perdemos unha alma bela, amable e gentil, cuxa música e cancións tocaron o corazón de todo o mundo e cuxo intelecto e procura da verdade inspiráronnos a todos", subliña a nota.

O mesmo comunicado agrega que Innes morrera "por causas naturais de forma inesperada e sen dor".

Comentarios