A localidade ourensá de Vilamartín de Valdeorras rozou os 40 graos centígrados de temperatura máxima, sendo o punto máis cálido rexistrado este luns en Galicia.
Ademais, a localidade lucense de Míllara —Pantón— viu como os termómetros superaban os 38 graos na tarde do luns, concretamente ás 17.45 horas. Outras localidades galegas tamén tiveron situacións semellantes, como é o caso de Remuíño —Arnoia (Ourense)—. Verín (Ourense) con 38.4º e Leiro (Ourense) con 38.0º son outros dos puntos máis cálidos da xeografía galega neste día.
Nesta xornada, o sur de Lugo e a provincia de Ourense permanecían en aviso amarelo por altas temperaturas. Así as cousas, o aviso amarelo por altas temperaturas desaparece en Galicia para este martes, segundo a predición da Axencia Estatal de Meteoroloxía (AEMET).
Por contra, activa o aviso amarelo por tormentas para as provincias de Lugo e Ourense para o segundo día da semana, no que os termómetros descenderán en toda a Comunidade aínda que se prevé que excedan os 30º en puntos de Lugo e Ourense.
