Primeiro alta hospitalaria a un paciente "curado" de coronavirus. O servizo de Neumoloxía, que dirixe o doutor Adolfo Baloira, enviou á súa casa ao un veciño de Meis de 45 anos que ingresara hai dúas semanas no Hospital Montecelo en estado "grave" tras unha viaxe a Madrid. "Esta alta supón un raio de esperanza para os sanitarios e a sociedade", explican fontes do Sergas.
O enfermo, que é transportista, foi o primeiro caso positivo de Covid-19 do área sanitaria de Pontevedra. Logo de acudir en dúas ocasións ao centro de saúde de A Parda, finalmente foi atendido e ingresado en Montecelo.
O seu caso obrigou a activar o protocolo de illamento a dous profesionais sanitarios da Parda: un médico do Punto de Atención Continuada e un facultativo do centro de saúde. Este último atendeu ao paciente o pasado 6 de marzo (venres) a través dunha cita urxente. Dous días máis tarde, o 8 de marzo (domingo), o paciente foi illado na sétima planta de Montecelo. O seu diagnóstico era o dunha pneumonía bilateral.
O 9 de marzo (luns) ao mediodía, o sanitairo que o atendeu na Parda foi informado de que tivera un contacto de risco. A partir do caso por coronavirus, cuxa primeira proba deu positivo o domingo 8 de marzo, fontes sanitarias afirmaron a Diario de Pontevedra que o médico mantivo a actividade de consulta ata media tarde. A partir de entón, e tras activarse o correspondente protocolo de prevención tras as queixas do profesional, ao facultativo ordenáronlle permanecer en corentena domiciliaria.
