Rajoy participará no peche de campaña do PP en Lugo e Ourense

Estará nas dúas capitais de provincia e nos concellos de Xinzo e Celanova arroupando os candidatos

Mariano Rajoy. SALVADOR SAS (EFE)
photo_camera Mariano Rajoy. SALVADOR SAS (EFE)

O expresidente do Goberno Mariano Rajoy participará este venres no peche de campaña do PP en Lugo e en tres municipios da provincia de Ourense, ademais da súa capital, para arroupar os respectivos candidatos ás alcaldías. Segundo confirman fontes do partido en Lugo, o que era ata ai menos dun ano presidente do PP nacional estará na mañá da última xornada de campaña acompañando ao candidato popular na cidade, Ramón Carballo, co que dará un pequeno paseo. 

Xa pola tarde, Rajoy desprazarase ata Ourense para facer un percorrido pola cidade xunto co rexedor e candidato á reelección, Jesús Vázquez Abad, tal e como indican fontes da formación na provincia. Posteriormente estará nos municipios ourensáns de Celanova e Xinzo, onde si participará en mitins de peche de campaña da man das respectivas candidaturas populares e do presidente do PP provincial, Manuel Baltar. 

O presidente de honra do PP de Galicia reaparecerá nesta comunidade despois de que o pasado venres 10 estivese prevista a súa presenza tanto en Lugo como en Ourense para dar o pistoletazo de saída á campaña. No entanto, debido ao falecemento aquel mesmo día do exvicepresidente do Goberno Alfredo Pérez Rubalcaba —socialista que foi rival seu nos xenerais de 2011—, acabou suspendendo a súa axenda.