O rexional e o universal "ténsanse" nunha das exposicións de arte galega máis grandes "da historia"

'Galicia universal. Arte galega nas coleccións Abanca e Afundación' estará na Cidade da Cultura ata o próximo 14 de outubro 

Juan Carlos Escotet e Alberto Núñez Feijóo, na inauguración da exposición. PEPE FERRÍN (AGN)
photo_camera Juan Carlos Escotet e Alberto Núñez Feijóo, na inauguración da exposición. PEPE FERRÍN (AGN)

O rexional e o universal "ténsanse e enriquecen mutuamente" na exposición Galicia universal. Arte galega nas coleccións Abanca e Afundación, que reúne un total de 192 obras de 119 autores e que foi inaugurada este venres na Cidade da Cultura. 

No acto de inauguración, ante artistas e autoridades, o titular da Xunta, Alberto Núñez Feijóo, erixiu á mostra en "unha das máis grandes de toda a historia" de Galicia, mentres que o presidente de Abanca, Juan Carlos Escotet, viu nela "un fito na historia recente das artes visuais" da comunidade. 

A directora de Acción Cultural do Gaiás, María Pereira, definiu 'Galicia universal' como "un diálogo" ou "unha viaxe" desde mediados do século XIX ata a actualidade. 

Trátase dunha selección articulada en sete seccións da inxente colección de Abanca e Afundación, herdeiras das extintas caixas de aforro galegas, Caixa Galicia e Caixanova. Respecto diso, Pereira destacou a "importante construción da historia da arte de Galicia" que supuxo "o investimento" en todas estas obras. 

Ata o próximo 14 de outubro e desde este venres, na primeira planta do Museo Centro Gaiás poderanse gozar os cadros e creacións de numerosos artistas de renome, entre eles Urbano Lugrís, Laxeiro, Castelao, Carlos Maside, Manuel Colmeiro, Isaac Díaz Pardo, Luis Seoane e Picasso, entre outros. 

Recibe ao visitante o mapa de Galicia de Lugrís, feito para un concesionario de coches da Coruña. Tamén hai un mural que Laxeiro fixo para o Café Moderno de Pontevedra e outros dous de Castelao, encargo do novo café de Vigo. 

Os máis interesados poderán guiarse a través da app de Abanca para a súa colección de arte, que escanea as obras para achegar unha ampla información sobre elas. 

A mostra avanza con retratos de mulleres como "imaxe do país", na que os autores do movemento renovador empregan en ocasións unha iconografía cristina e outras veces, a popular. 

Precisamente unha Escena popular galega é a que presenta o debuxo ao natural de Picasso, ao que Feijóo se referiu no seu discurso para lembrar a súa época en Galicia.

Comentarios