Rueda insiste en que a proposta dos sindicatos de Xustiza é "inasumible"

O vicepresidente da Xunta asegurou que "o fácil sería dicir que si" ás demandas da representación sindical

O vicepresidente da Xunta, Alfonso Rueda, insistiu en que "as cifras que están postas encima da mesa" por parte do comité de folga dos funcionarios da Administración de Xustiza de Galicia, que mantén os paros indefinidos desde o pasado 7 de febreiro, son "inasumibles". A preguntas dos xornalistas durante a presentación en Vigo da segunda fase das obras dos novos edificios xudiciais da cidade, asegurou que "o fácil sería dicir que si" ás demandas da representación sindical.

No entanto, mantivo que "iso non sería responsable nin obxectivo porque a Xunta negocia co diñeiro de todo o mundo". A Dirección Xeral de Xustiza anunciou este martes a convocatoria para este mércores da mesa de negociacións, que se reunirá ás 12.00 horas en Santiago de Compostela, lembrou o vicepresidente autonómico.

Na actualidade, a petición sindical é dun aumento salarial de 180 euros ao mes, 126 euros para este ano con efecto retroactivo a 1 de xaneiro e o resto a partir do ano próximo. A Xunta, en cambio, ofrece un incremento gradual ao longo de tres anos de 133,42 euros para os xestores, 108,42 para os tramitadores e 105 para os corpos de auxilio.

O tamén conselleiro de Presidencia, Administracións Públicas e Xustiza concretou que a proposta do Goberno autonómico "cumpre aquilo que nos pediron e o mandato parlamentario de que estivesen, coa garantía de que sempre vai ser así, por encima da media das comunidades autónomas". "É unha cifra que, en global, e xunto coa subida pactada a nivel estatal -para o conxunto de funcionarios do Estado-, situaríase por encima dos 300 euros" mensuais, detallou.

Ademais, mantivo que as demandas de explicacións da citada oferta de aumento de 300 euros xa "foron dadas" e espera que "ben dadas". Xustificou esta afirmación en que "o comité presentou un novo escrito dicindo que, á vista desas explicacións, si que querían sentar a negociar", unha cuestión para a que a Xunta, engadiu, sempre estivo disposta.

Un grupo de funcionarios xudiciais situouse ás portas do edificio administrativo do Executivo galego na cidade olívica para, ao berro de "Rueda covarde", apupar ao vicepresidente e solicitar a súa dimisión. Julio Bouza, delegado de SPJ-USO, mostrou ante os xornalistas as súas esperanzas en que durante a reunión deste mércores a Xunta "se digne a negociar e non a vir coa mesma proposta, que non admitimos".

Insistiu en que os traballadores seguen "esperando a que se aclare o dos 300 euros, porque se son parte da subida prevista no Estado, iso non é polo que estamos en folga", concluíu.

Comentarios