A Policía Nacional localizou a tempo a doce mozos, once deles menores de idade, que esta madrugada ingresaron no hospital tras mesturar con alcol diferentes cantidades de opiáceos, vasodilatadores e anticoagulantes que atoparon nunha rúa de Vigo.
Segundo informou este luns, a Policía recibiu unha chamada ás 03:00 de madrugada do Servizo de Urxencias informando de que un menor ingresara en coma pola inxesta de medicamentos atopados na vía pública.
Segundo relatou o persoal da ambulancia, asistiran e salvaran por pouco a un menor que se atopaba tirado na Avenida da Florida cunha parada cardiorespiratoria, ao parecer provocada polo consumo de opiáceos e antidepresivos.
Os axentes temeron que este mozo non estivese só no momento de consumir as sustancias, polo que procederon a interrogalo.
A pesar de estar sedado, o paciente deu o nome de varios amigos aos axentes, e estes, tras consultar a axenda do teléfono móbil do paciente, puideron contactar cun deles, o cal lles informou que había poucas horas mesturaran diversas pastillas e alcol.
Nese momento, os axentes estableceron en coordinación coa Sala Operativa do 091 e o hospital un dispositivo para localizar con urxencia ao resto de menores que inxeriran medicamentos, xa que segundo o persoal médico ese tipo de inxesta na cal se mesturaban anticoagulantes, vasodilatadores e opiáceos con alcol pode resultar mortal.
Para mellorar o tempo de resposta, os axentes encargados da localización utilizaron as redes sociais que varios deles compartían, á vez que outra dotación se dirixía á Praza Eugenio Fadrique, onde un dos menores indicou que atoparan os medicamentos tirados á beira dun colector.
Minutos máis tarde, os policías recolleron case 140 caixas de medicamentos e leváronos ao hospital para que o persoal de área de toxicoloxía puidese determinar que tipo de tratamento debían aplicar aos menores que ían chegando.
Finalmente localizouse e ingresou a once menores, con idades comprendidas entre os 14 e os 17 anos, así como un mozo maior de idade, ademais de contactar con outros dous mozos que estaban nese grupo pero que non consumiran nada.