A artista galega Sés presentará en Ribadeo o vindeiro sábado 4 de maio no Auditorio Hernán Naval o seu novo disco, Rabia ao Silencio, no que propón un traballo acústico e máis íntimo.
Rabia ao Silencio é un traballo composto por unha recompilación de cancións populares, folclóricas ou de autor adaptadas pola autora, ligadas ao pobo do que emanaron, desde ultramar (Cuba, Arxentina ou Brasil) até a Península, con sons de Zeca Afonso, Fuxan vos Ventos ou Mercedes Sosa.
Segundo a propia autora, o disco responde a unha débeda contraída con quen lle ensinou a narrar a verdadeira historia e non a dos vencedores. "Agora que se confunde a profesionalidade musical coa indiferenza, o individualismo e a covardía, Rabia ao silencio era unha obrigación para min", expresou.
As entradas para o concerto están á venda en ticketea.com. A súa xira por Galicia inclúe tamén un concerto no Auditorio municipal de Ourense o 11 de maio e no Teatro Jofre de Ferrol o 19.