O escritor Mario Vargas Llosa, quen publica novo ensaio, A chamada da tribo (Alfaguara), mostrouse "preocupado" pola recente "censura de libros e cadros" en España e entende que é unha decisión "antidemocrática que hai que combater".
"A cultura debe manifestarse con toda liberdade gústenos ou non", defendeu o autor peruano durante a presentación en Madrid da súa obra, na que reflexiona sobre o liberalismo a través de sete autores que influíron na súa formación intelectual.
Vargas Llosa recoñeceu que, no caso da obra de Santiago Sierra retirada en Arco, Presos políticos, non se trata dunha peza da súa agrado, pero non habería que retirala. "O cadro dese señor non era un cadro, era unha estupidez e provocación, pero retiralo foi unha tolemia, porque dan un prestixio extraordinario a unha simple provocación", sinalou.
En canto ao libro Fariña, recoñeceu non lelo, pero apunta "estar sempre en contra da prohibición" das obras literarias. "A censura non debe existir, hai que abrir a porta porque é un principio liberal básico", matizou.
CATALUÑA: QUE SE IMPOÑA O SENY. Vargas Llosa tamén repasou a actual situación política, con especial atención a Cataluña, onde "afortunadamente" a posibilidade de independencia "vai quedando atrás". "A miña esperanza é que Cataluña volva ser outra vez a vangarda de España, que este fenómeno quedase atrás e o seny se impoña", destacou.
Tamén aludiu a Venezuela, onde non espera nada dunhas próximas eleccións que "van ser unha farsa". "Só se pode esperar unha fraude monumental e non creo que haxa xente tan inxenua como o expresidente español José Luís Rodríguez Zapatero que invoca a ir votar a unha mentira tan flagrante", concluíu.
