O xulgado de primeira instancia e instrución número 7 de Collado Villalba (Madrid) ordenou a "eliminación inmediata" da ferramenta dixital que, a través de O Quixote, permite ler Fariña, o libro escrito por Nacho Carretero sobre o narcotráfico en Galicia, secuestrado por un xuíz.
Nun oficio do pasado 23 de marzo, o xulgado pide aos libreiros madrileños que "tendo en conta o deber de todos os cidadáns de colaborar co cumprimento das resolucións xudiciais", procedan "á eliminación inmediata" da ferramenta Finding Fariña, que permite, na páxina web https://findingfarina.com a lectura en liña do libro Fariña.
O xulgado tamén os insta a absterse de crear "calquera outra aplicación semellante tendente a obstaculizar" o cumprimento do acordado no auto do 12 de febreiro de 2018 polo que se acorda o secuestro da publicación do libro Fariña e a prohibición de impresión e comercialización de novos exemplares, así como a providencia de 26 de febreiro de 2018 para a execución de devandita resolución.
Así o acorda o xulgado baixo apercibimento de poder incorrer nun delito de desobediencia tipificado no artigo 556 do Código Penal.
O Gremio de Librerías de Madrid bloqueou o acceso á páxina "en cumprimento do oficio ditado polo Xulgado de Instrución número 7 de Collado Villalba". "Era unha posibilidade que barallabamos. Fixemos isto sabendo a que nos expuñamos. Xogabamos coa vantaxe da sorpresa ata que o xulgado solicitase o bloqueo da páxina", explicou a Efe o secretario do Gremio de Librerías de Madrid, Fernando Valverde.
A CAMPAÑA. Os libreiros madrileños puxeron en marcha o 15 de marzo a campaña FindingFariña para reivindicar a liberdade de prensa e o dereito a ler este libro, así como expresar a súa oposición a unha medida "extrema e anacrónica" como o secuestro.
A ferramenta dixital permitía a todos os interesados buscar e atopar as 80.000 palabras de Fariña dentro da obra máis universal da literatura española, O Quixote e extraía unha a unha as palabras para coñecer a historia prohibida.
Valverde opinou que o secuestro de Fariña é "un disparate", que "non debería suceder nunha democracia" e agregou que "en tempos dixitais que alguén dite unha medida desta natureza cando o libro leva dous anos e medio na rúa ten pouco de cautelar".
O Gremio de Librerías de Madrid animou aos libreiros a que o texto non se fose das librerías ata que non houbese unha execución do auto, pero a partir dese momento acatouse a decisión xudicial, desde a discrepancia.
Valverde indicou que o libro se esgotou rapidamente e asegurou que lle consta que nin a editorial Libros do K.O., nin a distribuidora desobedeceron a orde do xuíz.
De Fariña, escrito por Nacho Carretero e publicado por Libros do K.O. en 2015, vendéronse uns 30.000 exemplares en dez edicións.
A DENUNCIA DE BEA GONDAR. O libro sufriu o primeiro secuestro literario en España en máis dunha década, como medida cautelar pola demanda presentada polo exalcalde do Grove José Alfredo Bea Gondar por vulneración do seu dereito á honra.
Bea Gondar aparece mencionado en dúas ocasións na obra polos seus supostos vínculos co narcotráfico, uns feitos que foron confirmados pola Audiencia Nacional, aínda que o Tribunal Supremo revogou esa sentenza por un defecto de forma.
Ademais, o libro serviu de base para o guión da serie homónima de televisión emitida desde finais de febreiro pasado pola canle Antena 3 cunha elevada audiencia.
