O Goberno galego ha dado este venres o visto e prace ao seu proxecto de orzamentos para 2021 por 11.563 millóns de euros, un 14 por cento máis (13,93 %) que o ano anterior, o maior orzamento da historia autonómica co obxectivo de reactivar a economía, loitar contra a covid e axudar ás familias.
O texto que enviará a Xunta ao Parlamento fixa, ademais, un investimento de 2.592 millóns de euros, "o triplo" que o investimento territorializado prevista nos orzamentos estatais para Galicia e mantén as rebaixas de impostos dos últimos anos, de herdanzas, sucesións e doazóns e de compra venda de vivendas, aluguer ou permutas no rural, entre outras, coas que prevé beneficiar a 115.000 familias.
As contas esgotarán o teito de gasto aprobado no Parlamento, fixado en 11.664 millóns de euros, xa que hai que sumar gastos do capítulo oito, como instrumentos financeiros de apoio a empresas, con cargo ao Igape e a Xesgalicia.
Como xa avanzaron durante esta semana, as contas presentadas polo presidente da Xunta, Alberto Núñez Feijóo, e o conselleiro de Facenda, Valeriano Martínez, manteñen o salario do Goberno galego conxelado para o próximo ano, non así do de altos cargos, que subirán o 0,9 por cento permitido polo Goberno.
O proxecto prevé tamén o pago de menores intereses pola débeda, que baixa dos cen millóns de euros por primeira vez en vinte e cinco anos, segundo o xefe do Executivo galego, e supón un 30 % menos que o ano anterior; a pesar de que a comunidade se endebedará por 685 millóns máis.
Tanto Núñez Feijóo como o conselleiro de Facenda destacaron que a actuación "prudente" da Xunta durante os últimos anos permitiu a Galicia aforrarse máis de 5.000 millóns en endebedamento, o que dá á comunidade unha maior capacidade para actuar este ano.
Xunto á capacidade de gasto "extraordinaria" deste ano, a principal novidade das contas presentadas pola Xunta é a creación de catro fondos específicos, o máis importante o denominado Fondo Covid, dotado con 503 millóns de euros, para enfrontar a pandemia.
Os outros fondos creados son o denominado REACT-EU, dotado con 430 millóns de euros e outro chamado Consenso, que reserva 115 millóns de euros para financiar posibles acordos da comisión de reactivación do Parlamento, negociacións do diálogo social ou propostas do comité de expertos.
Tamén se crea un fondo de coberturas sanitarias por 105 millóns de euros, de carácter plurianual e que ten como obxectivo "blindar" as actuacións necesarias en hospitais e centros de saúde durante a lexislatura.
Por áreas, as contas prevén destinar a gasto social -sanidade, educación, política social e emprego- 8.540 millóns en total, un 11,2 % máis.
Son 864 millóns máis que repártense en sanidade (475 millóns máis); educación (166 millóns máis); política social (126 millóns máis) e emprego (97 millóns máis).
Ademais destas partidas, as destinadas ao Xacobeo 2021 suman 61,7 millóns de euros.
O proxecto de contas presenta uns 1.800 millóns de euros de ingresos extraordinarios, dos que 685 proceden de transferencias extraordinarias, a mesma cantidade (685 millóns) de endebedamento e o resto, 430 millóns, dos fondos de reactivación europeos.
En canto ao cadro macroeconómico, a Xunta destacou que as súas previsións contan co aval da Autoridade Independente de Responsabilidade Fiscal (AIReF).
Deste xeito, a previsión é acabar o ano cunha caída do PIB do 9,7 por cento e que a economía galega repunte un 8 por cento o próximo ano.
En canto ao emprego, a taxa de paro situarase no 12,3 por cento a final deste ano, uns cinco puntos menos que a media de España, e subirá ao 12,9 por cento en 2021, segundo as previsións do Executivo autonómico.
Núñez Feijóo destacou, ademais, a estabilidade política á hora de aprobar as contas, xa que mentres Galicia en catro anos celebrou unhas eleccións e terá catro orzamentos, en España houbo "catro eleccións e un só orzamento".
