O portavoz do PNV no Congreso dos Deputados, Aitor Esteban, o exministro de Interior, Juan Ignacio Zoido, e o líder de Ciudadanos, Albert Rivera, recriminaron este luns que o coordinador xeral de EH Bildu, Arnaldo Otegi, eloxie agora a aposta polo diálogo que fixo o exministro socialista Ernest Lluch, asasinado por Eta en Barcelona no ano 2000. Esteban comentou que "xa o podían pensar antes".
En declaracións a Onda Cero, recollidas por Europa Press, o dirixente jeltzale foi preguntado polas declaracións realizadas por Otegi nunha entrevista en TV3, onde sinala que faltan na política española figuras como a de Ernest Lluch, "na medida en que defendía o diálogo como método para resolver problemas políticos e agora achegaría racionalidade ao actual contexto" en Cataluña.
O dirixente jeltzale afirmou que a Arnaldo Otegi non lle vai "sacar a cara". "Están afundidos nun mar de contradicións. Xa o podían pensar antes. Eta matou e asasinou a moitas persoas que tendían pontes e querían o diálogo. Alégrome que cambie de opinión, pero oxalá fora moito antes", afirmou.
RIVERA. Albert Rivera tamén censurou as declaracións. Rivera publicou na súa conta de Twitter un extracto da entrevista a Otegi. "Señor Otegi: é certo que nos falta Ernest Lluch, e tamén Fernando Múgica, Miguel Ángel Blanco, Fernando Buesa, Gregorio Ordóñez... Non sei se se acorda, pero están todos enterrados porque os asasinastes os terroristas de Eta. Moi pouca vergoña", escribiu o líder de Ciudadanos, enumerando a varios políticos do PP e do PSOE que foron vítimas da banda terrorista.
ZOIDO. Tamén Zoido, ministro do Interior con Mariano Rajoy, criticou as palabras de Otegi por defender a figura de Lluch como home de diálogo "cando foi asasinado vilmente polos terroristas de Eta". "Non se pode ser máis cínico", escribiu nunha mensaxe en Twitter.
