A Plataforma de Afectados iDental, con sede en Alacante, solicitou este xoves nun comunicado axuda ás administracións públicas para os prexudicados polo peche destas clínicas odontolóxicas, algúns dos cales se atopan en situación de auténtica "urxencia sanitaria".
"Resulta unha evidencia que as clínicas Idental non están en disposición de finalizar os tratamentos odontolóxicos contratados polos afectados", sinala a nota de prensa, polo que a estes non queda "máis opción que terminalos con outros dentistas".
A plataforma agradece a axuda e asesoramento que están a brindar aos pacientes moitas clínicas e colexios de odontólogos, así como a colaboración de colectivos como o Centro Colegas, que está a realizar "desinteresadamente" probas rápidas para detectar o virus VIH e outras posibles infeccións. Con todo, quere facer un chamamento ás administracións públicas" para que adopten mecanismos de axuda, sobre todo odontolóxica, aos afectados, que atravesan en moitos casos situacións de auténtica "urxencia sanitaria".
Ao seu xuízo, teñen dereito a deixar de pagar as cotas dos préstamos que subscribiron con entidades financeiras para financiar eses tratamentos en clínicas da cadea Idental en virtude da Lei de Créditos ao Consumo.
A plataforma entende que existe, "sen dúbida, unha vinculación legal" entre o contrato financeiro e o sanitario, aínda que antes de deixar de abonar os créditos os usuarios deben remitir unha "comunicación fehacente" onde así o advirtan a ambas as partes.
Lamentan que as entidades financeiras implicadas neste caso non estean "a colaborar a día de hoxe como cabería esperar" e sigan reclamando en moitos casos os pagos dos créditos aos pacientes, "so pena de resultar demandados ou incluídos en listaxes de morosos", polo que fai un chamamento "á súa responsabilidade".
Esta plataforma renunciou polo momento a emprender "accións colectivas" dadas as investigacións penais en marcha e as iniciativas de múltiples "asociacións" de afectados en España, polo que se está centrando en estudar "cada caso de forma individual".
