As autoridades sanitarias alemás confirmaron outros tres casos de contaxio con coronavirus, supostamente relacionados coa primeira infección dun paciente de 33 anos en Baviera.
O Ministerio de Sanidade bávaro informou deses novos casos, que se suman ao contaxio confirmado a madrugada pasada, orixinado polo contacto do home afectado cunha colega procedente de Xangai que se atopaba de visita en Alemaña.
Os catro afectados traballan na empresa Webasto, no distrito bávaro de Starnberg, onde acudira hai uns días a impartir un curso de capacitación a colega procedente de China.
Ao parecer a muller, que chegara a Alemaña o 19 de xaneiro, non presentou síntomas de contaxio durante a súa estancia no país. De regreso a China empezou a sentirse mal, acudiu ao médico e deu positivo.
A información do contaxio da muller transmitiuse o luns á empresa Webasto en Alemaña, que informou de inmediato aos seus empregados e ás autoridades sanitarias bávaras.
Tras confirmarse o primeiro contaxio, a noite pasada, as autoridades sanitarias procederon a tratar de localizar outras posibles infeccións secundarias entre o persoal da empresa ou outras persoas relacionadas.
O goberno de Alemaña recomendou este martes non viaxar á provincia de Hubei, mentres se estuda unha eventual evacuación dos 90 alemáns que se atopa nesa cidade.
Ata agora, a recomendación do Ministerio de Exteriores a non viaxar limitábase a Wuhan, non ao conxunto da provincia.
