A xornalista marroquí Hajar Raissouni, de 28 anos, foi condenada este luns a un ano de cárcere polos delitos de aborto e de manter relacións fóra de matrimonio, nun dos casos máis soados dos últimos anos en Marrocos. Tamén o seu noivo —de nacionalidade sudanesa— está condenado no caso polo Tribunal de Primeira Instancia de Rabat á mesma pena por idénticos delitos. Mentres, ao médico que supostamente practicou o aborto impuxéronselle dous anos de prisión e outros dous máis de prohibición de exercicio da profesión médica.
Ademais destas tres condenas en firme, o anestesista que asistiu ao médico no aborto, un home de 83 anos, foi condenado a un ano de liberdade condicional, mentres que á asistenta da clínica onde se produciron os feitos impuxéronselle oito meses, coa sentenza en suspenso.
"É unha sentenza que se contradí co espírito da lei e a ciencia porque houbo probas que mostran que non houbo aborto", sostivo un dos avogados defensores da xornalista, Abdelmoula Marouri. Durante as anteriores tres vistas, os cinco condenados negaron en todo momento que houbese aborto. Na mesma liña, varios dos trinta avogados que se presentaron voluntarios neste caso defenderon en todo momento que a xornalista e o resto de condenados non estaban en situación de infracción da lei.
Durante as anteriores tres vistas, os cinco condenados negaron en todo momento que houbese aborto
O caso de Raissouni suscitou unha enorme indignación e unha campaña de solidariedade inédita nas redes sociais, dentro e fóra de Marrocos. Nada máis coñecerse o veredicto, escoitábanse berros e prantos dos amigos e familiares da xornalista e do resto dos acusados nunha sala que estaba repleta de activistas de dereitos humanos, avogados e xornalistas nacionais e internacionais.
"Nós, como xornalistas marroquís pensamos, que houbo irregularidades á hora de arrestar a Raissouni, e ademais denunciamos a gran campaña de difamación á que foi exposta a xornalista", dixo a Efe Charki Lahrach, do semanario Telquel. Lahrach —que acudiu á vista deste luns xunto a outros moitos profesionais do sector— engadiu que máis de 150 xornalistas asinaron un manifesto contra os actos de difamación que sufriu Raissouni.
En 2018, un total de 73 persoas foron perseguidas polo delito de aborto, pero estes xuízos non mereceron a mesma atención mediática.
Segundo a Asociación Marroquí para a Loita contra o Aborto Clandestino, entre 600 e 800 abortos practícanse ilegalmente no país cada día, ás veces en clínicas clandestinas que reúnen certos estándares e outras veces levados a cabo por curandeiras con métodos caseiros sen a menor garantía médica.
O caso de Hajar abriu tamén o debate sobre as liberdades individuais, máxime cando unha modificación do actual Código Penal está actualmente no Parlamento. Neste debate deixouse oír con máis forza a corrente progresista no país, que reclama a despenalización das relacións extramaritais, do aborto ou da homosexualidade.
