A candidata de Ciudadanos ao Congreso por Barcelona Inés Arrimadas advertiu este venres en Vigo de que dar máis autogoberno aos nacionalistas supón darlles ferramentas para "destruír o país", e instou a non "tropezar na mesma pedra". A dirixente de Cs participou nun encontro con afiliados e simpatizantes nun bar de Vigo, no que estivo acompañada pola candidata por Pontevedra, Beatriz Piñeiro. Foi nunha parada da iniciativa Vamos de Canas con Inés Arrimadas, que pola mañá a levara á Coruña.
Na cidade olívica, a portavoz de Ciudadanos fixo alusión a unhas declaracións do secretario xeral do PP, Teodoro García Egea —que el mesmo matizou despois—, sobre a posibilidade de negociar un maior autogoberno en Cataluña. "Agora Teodoro García Egea di que se lle pode dar máis competencias a Cataluña se se portan ben. ¿Pero de verdade imos seguir tropezando na mesma pedra? ¿Pero non nos damos conta de que os nacionalistas utilizan as competencias para ter máis ferramentas para destruír este país? ¿Imos seguir votando aos mesmos para que sigan facendo o mesmo?", cuestionou.
Arrimadas incidiu en que España é un país "diverso" que está "mellor unido" e proclamou que "xa está ben de que os nacionalismos que odian España marquen a batuta de Goberno de España". Así, declarouse "orgullosa de ser española" e rexeitou ter que usar "pasaporte" para visitar Galicia ou que os nacionalistas consigan facer "estranxeiros" aos galegos en Cataluña.
Arrimadas: "O Goberno de España está pendente de Franco e de que non se lle molesten os seus socios nacionalistas"
A ese respecto, Arrimadas incidiu en que o problema catalán éo tamén do resto de españois e advertiu de que o nacionalismo "se contaxia máis que a gripe". Foi máis aló ao asegurar que se o PSOE "segue facendo" o que está a facer "chegará un día en que as imaxes que vemos en televisión agora de Cataluña se vexan tamén noutras comunidades, como Navarra, Valencia ou Baleares".
A dirixente de Cs proclamou que "o único voto que garante un goberno serio" é o voto ao partido laranxa, que, tras estar na oposición en moitas institucións, "aprendeu" e está "preparado" para gobernar, como asegura que se demostrou en Andalucía.
A CORUÑA. Profundou así na mensaxe que trasladara pola mañá na Coruña, onde advertiu de que "o que está a pasar en Cataluña" afecta "á competitividade de España" e á imaxe do país en todo o mundo. Na capital herculina, acompañada da candidata da formación laranxa pola Coruña, María Vilas, lamentou que "o Goberno de España está pendente de Franco e de que non se lle molesten os seus socios nacionalistas" cando debería "liderar en Europa un proxecto" que "defenda os produtos españois" ante o Brexit.
Por todo iso, pediu que o 10 de novembro sexa unha "oportunidade" para un partido que xa goberna en distintas comunidades "para vinte millóns de españois". "En Galicia sabedes moi ben o que é o bipartidismo, escoitar as promesas do PP e do PSOE cando están na oposición que nunca cumpren cando están no goberno", dixo.
