España vai acoller a quince inmigrantes dos máis de cen rescatados polo barco Open Arms e desembarcados na illa de Lampedusa (Italia), e traeraos no buque da Armada Española Audaz, que está previsto que chegue mañá para recollelos e completar a misión encomendada polo Goberno.
A cota de quince migrantes é a cifra fixada na repartición inicial feita pola Comisión Europea, no que tamén participan Alemaña, Francia, Luxemburgo e Portugal, explicou este xoves a vicepresidenta do Goberno en funcións, Carmen Calvo. Ademais de coñecerse a repartición das persoas migrantes, este xoves o grupo Unidas Podemos, xunto con ERC e Compromís, anunciou que vai solicitar a comparecencia de Calvo para falar sobre a crise do Open Arms. Petición que se suma á feita este mércores por PP e Cidadáns para que compareza de forma urxente o presidente do Goberno en funcións Pedro Sánchez para explicar a xestión do Executivo ante os problemas de migración que acontecen no Mediterráneo e o Open Arms.
Os migrantes, que viviron 20 días amontoados na cuberta do Open Arms tras ser rescatados no Mediterráneo, esperan a súa repartición nun centro de acollida de Lampedusa, aínda que poderían ser trasladados a outro en Sicilia ata que se resolva a súa distribución. Calvo considerou que o máis útil e eficiente é que o Audaz termine a súa ruta, traia á cota de migrantes que corresponda e complete a "resposta humanitaria" que iniciou o presidente do Goberno, Pedro Sánchez, cando enviou o buque.
Ao que non se fixo referencia é á advertencia feita polo Executivo sobre a posible multa de 900.000 euros á que podería enfrontarse o Open Arms por non ter permiso para rescatar persoas. Algo sobre o que o coordinador federal de Esquerda Unida e portavoz adxunto de Unidas Podemos, Alberto Garzón, remitiu unha pregunta por escrito ao Executivo. Garzón pregunta a canto ascendería a multa se en lugar de salvar a vida a máis de 160 persoas, esta ONG as abandonase.
En canto á inmovilización do barco, a Garda Costeira italiana informou nun comunicado de que tras realizar unha inspección na embarcación, que actualmente se atopa en Sicilia, se atoparon "anomalías graves relacionadas coa seguridade da navegación, o cumprimento da lexislación sobre protección do medioambiente mariño e a capacitación e familiarización da tripulación cos procedementos de urxencia proporcionados a bordo". Por iso, o barco quedará retido e non poderá saír do porto de Porto Empedocle, onde se atopa, "ata que se corrixan as irregularidades técnicas e operativas detectadas durante a inspección".
