Axentes da Policía Nacional detiveron nun hospital de Valencia a unha muller e un home, de 24 e 29 anos, como presuntos autores dun delito de abandono de menor, tras ingresar cun bebé de 17 meses en coma que deu positivo en ouriños a intoxicación por cocaína e cannabis.
A muller, con antecedentes policiais, é a nai do bebé e o home a parella sentimental desta, segundo informa a Policía, que engade que ambos pasaron este luns a disposición xudicial.
Os feitos ocorreron o pasado venres pola mañá cando os axentes tiveron coñecemento a través dun Xulgado de Valencia de que un menor de 17 meses, esa mesma madrugada, ingresara na UCI Pediátrica dun hospital, en estado de coma, dando positivo nas análises practicadas por intoxicación por cocaína e cannabis.
Os policías pescudaron que sobre as tres da madrugada o bebé chegara con convulsións cos seus pais, polo que tras fornecerlle a medicación necesaria ingresárono na UCI, onde permaneceu entubado.
A analítica de ouriños que lle realizaron ao menor dera positivo en cocaína e cannabis, aínda que descoñecéndose a cantidade que inxeriría.
Como consecuencia das investigacións os axentes detiveron á nai e á parella desta como presuntos autores dun delito de abandono de menor, mentres o bebé continúa ingresado.
