Bertín Osborne admitiu nunha entrevista en 1985 que pegara "algunha vez" a unha muller

As redes recuperan un programa no que o cantante fala da súa relación coas mulleres e de machismo
Bertín Osborne, en la entrevista de 1985. TVE
photo_camera Bertín Osborne, na entrevista de 1985. TVE

A polémica non abandona a Bertín Osborne. Tras as reaccións que xeraron as súas recentes declaracións sobre o feminismo nunha entrevista, e logo de responder a elas este mércores con dous vídeos vía Twitter que volveron acender as redes, estas serviron para recuperar unha entrevista que o cantante e presentador ofreceu en 1985 a TVE e na que recoñeceu que pegara "algunha vez" a unha muller.

A entrevista, dispoñible no arquivo de RTVE, foi divulgada por un usuario de Twitter. Nela, no programa De la mano de..., Jorge López Pedrol pregunta a Osborne se algunha vez pegara a unha muller, algo que o cantante recoñece asegurando que se arrepinte "moitísimo".

"Estas mans túas, que imaxino que tantas peles de muller acariñaron, ¿nalgunha ocasión tamén lle pegaron a algunha muller?", pregunta López Pedrol. "Non creo que xamais tivese dereito a facelo e arrepíntome moitísimo, pero si o fixen algunha vez", responde Bertín Osborne.

O cantante maniféstase así logo de asegurar, noutro momento da entrevista, que recibiu algunha labazada dalgunha muller. "Fixéronme de todo. Rompéronme cadeiras nas costas, cinceiros de cristal...", sinala, tras o que López Pedrol lle pregunta se recoñece "que estaban xustificadas esas agresións". "Recoñezo que si", responde.

Na conversa, Osborne xa se enfrontara pouco antes á pregunta de se é machista, ante a que asegura que "as primeiras machistas son as mulleres". "A elas arrepiaríalles perder o seu status, o que nós lles demos", di.

Comentarios