O ministro de Exteriores británico, Boris Johnson, dimitiu este luns cunha carta na que explicaba os motivos que o levaron a tomar a decisión. O político británico asegura que o proceso do Brexit, tal como el esperaba que se desenvolvese, é un "soño" que se está "morrendo".
A saída británica da Unión Europea (UE) "debería ser unha oportunidade para facer as cousas de forma diferente" e "maximizar as vantaxes particulares do Reino Unido como unha economía aberta, global e coas miras cara ao exterior", sinala Johnson no escrito dirixido á primeira ministra, a conservadora Theresa May, no que lle comunica a súa renuncia.
"Ese soño está a morrer, afogado por unhas dúbidas innecesarias", sostivo o exalcalde de Londres, que criticou que o plan para o Brexit, aprobado de forma colectiva o venres polo Goberno británico, significa que o Reino Unido seguirá sen ser un país "independente" tras abandonar a UE.
A renuncia de Johnson, un dos membros do Goberno máis favorables a un Brexit duro, prodúcese pouco despois da dimisión este domingo á noite do ministro para a saída da Unión Europea (UE), David Davis. "Este mediodía, a primeira ministra aceptou a renuncia de Boris Johnson como ministro de Exteriores", sinalou un portavoz de Downing Street nun conciso comunicado.
AGRADECE O SEU TRABALLO. A nota agrega que May "agradece a Boris o seu traballo" á fronte do Foreign Office, do que tomou as rendas en xullo de 2016, menos dun mes despois do referendo no que o 51,9% dos votantes pronunciáronse a favor de abandonar a Unión Europea (UE).
Johnson, que foi alcalde de Londres entre maio de 2008 e maio de 2016, foi unha das caras máis visibles da campaña favorable ao Brexit antes daquel plebiscito. O ata agora responsable de Exteriores criticou a semana pasada o plan de May de formar unha "área de libre comercio" coa UE tras o Brexit, aínda que o venres, nunha reunión dos membros do Goberno na residencia campestre de Chequers, non se opuxo de xeito formal á súa aprobación.
Segundo revelou a cadea BBC, durante o encontro a porta pechada Johnson argumentou que o plan de May convertería ao Reino Unido nun "Estado vasallo", ao comprometerse a cumprir o "libro de normas" comunitario en canto ao comercio de bens, a pesar de estar xa fóra do bloque comunitario.
