A borrasca Gloria comeza a remitir, aínda que doce comunidades continúan este martes en aviso por neve, vento, choivas e intensa ondada, con especial incidencia en Aragón e Cataluña, onde hai aviso vermello por copiosas nevadas e por mala mar respectivamente, segundo informa a Axencia de Meteoroloxía (Aemet) na súa web. No caso de Galicia mantense a alerta laranxa na costa da provincia da Coruña —por ondas de ata 6 metros— e en Lugo a amarela, o nivel da activada para o interior das dúas provincias por refachos de vento de ata 80 quilómetros por hora.
Un total de 204 vías españolas rexistraban á primeira hora deste martes dificultades para a circulación de vehículos pola neve caída nas últimas horas, das que 57 son intransitables. Mentres, en 86 necesítanse cadeas.
Aragón segue con aviso vermello (risco extremo) na provincia de Teruel por fortes nevadas que deixarán unha acumulación de neve de 50 centímetros en 24 horas en puntos de Gúdar e Maestrazgo. A Aemet sinala que a cota de neve subirá paulatinamente para situarse en 1.400 metros. En Zaragoza, mentres, hai alerta laranxa (risco importante) por nevadas intensas na ibérica zaragozana por encima dos 1.000 metros e aviso amarelo por refachos fortes de vento e Huesca continúa en amarelo por refachos de 80 quilómetros por hora.
En Aragón e Cataluña a alerta é vermella
Cataluña ten aviso vermello en Barcelona e Girona por forte ondada con ondas de 7 metros. A Aemet alerta de que poderían ocasionar "alto impacto" en paseos marítimos e liñas de costa. Nesas dúas provincias e en Tarragona hai tamén aviso laranxa por nevadas, fortes choivas ou refachos de vento.
En Castilla-La Mancha persiste a alerta laranxa en Albacete, Cuenca e Guadalaxara, onde se prevén copiosas nevadas nunha cota entre os 800 e os 1.000 metros, que deixarán 20 centímetros de espesor en 24 horas en puntos de Alcaraz, Segura, na serranía de Cuenca e en Parameras de Molina.
Na fachada mediterránea as illas Balears continúan en laranxa por fenómenos costeiros adversos con ventos do leste e do nordeste e con ondas ente os 4 e 6 metros.
Na Comunitat Valenciana, unha das máis afectadas o temporal, persiste a alerta laranxa por mala mar, con forte ondada entre os 4 e 6 metros, e aviso tamén laranxa por nevadas no norte de Castelló e por fortes choivas no interior norte de Castelló e no interior sur e litoral sur de Valencia.
Pola súa banda, Andalucía, Madrid, Castilla y León, La Rioja, Asturias e Murcia activaron o aviso amarelo (risco) por choivas, nevadas, vento ou ondada
