O ministro de Asuntos Exteriores, Josep Borrell, advertiu este domingo de que España non apoiaría unha intervención militar estranxeira en Venezuela e condenaría esta acción, asegurando que "non todas as posicións están sobre a mesa" para solucionar esa crise.
"Non todas as posicións están sobre a mesa. Advertimos claramente que non apoiariamos e condenariamos firmemente calquera intervención militar estranxeira, que esperamos que non se produza", dixo a Efe Borrell en Exipto, antes da inauguración do cume entre a liga Árabe e a Unión Europea (UE).
O ministro español subliñou que "a solución en Venezuela non pode provir máis que dunha solución democrática pactada entre os venezolanos e da convocatoria dunhas eleccións presidenciais".
Así mesmo, Borrell puntualizou que España está a buscar unha posición común cos seus socios europeos na cuestión venezolana.
"España xoga neste terreo exercendo un evidente liderado na Unión Europea pero xogamos conxuntamente con outros países europeos unha posición común", afirmou, ao agregar que "hai un grupo de contacto da UE nestes momentos en Caracas".
O xefe do Parlamento venezolano, Juan Guaidó, quen se proclamou presidente encargado hai un mes, dixo este sábado que o seu país exporá formalmente á comunidade internacional "ter abertas todas as opcións" para liberar á súa patria.
Guaidó divulgou a súa mensaxe tras os disturbios ocorridos nos pasos fronteirizos por onde se esperaba que ingresase a Venezuela a axuda humanitaria que se almacena en Brasil e Colombia e que foi bloqueada por funcionarios do Goberno de Nicolás Maduro.
Este primeiro intento de levar axuda humanitaria terminou en violentos enfrontamentos nos que houbo varios mortos e decenas de feridos.
A crise política venezolana acentuouse en xaneiro pasado, cando Guaidó anunciou que asumía funcións de presidente encargado de Venezuela tras descoñecer o novo mandato de Maduro, elixido nuns comicios que, denuncia, foron fraudulentos.
España e varios países da Unión Europea recoñeceron a Guaidó como "presidente encargado" e pediron a convocatoria dunhas eleccións que axuden a superar a situación que vive o país.
