A Comisión Europea (CE) impuxo este mércores a Google unha multa de 4.343 millóns de euros por exercer prácticas ilegais co seu sistema operativo para teléfonos móbiles Android, co fin de reforzar o dominio do seu buscador. Trátase da maior sanción inflixida na historia do regulador comunitario.
O executivo comunitario declarou nun comunicado que "Google impuxo restricións ilegais aos fabricantes de dispositivos Android e operadores de redes móbiles para consolidar a súa posición de dominio nas procuras en internet".
Esta sanción súmase á multa de 2.424 millóns de euros que o Executivo comunitario impuxo ao xigante estadounidense en xuño de 2017, por abuso de dominio ao favorecer ao seu servizo de comparación de compras no seu motor de procura, que ata este mércores constituía a sanción máis alta imposta por Bruxelas a unha soa empresa.
A comisaria europea de Competencia: "Google negou aos rivais a posibilidade de innovar e competir polos seus méritos"
A comisaria europea de Competencia, Margrethe Vestager, sinalou que Google impón tres tipos de restricións "para asegurar que o tráfico dos dispositivos Android vaia ao motor de procura da compañía", o que a xuízo de Bruxelas "negou aos rivais a posibilidade de innovar e competir polos seus méritos" e, aos consumidores, "os beneficios" de tal competencia. En concreto, Bruxelas alega que Google esixiu aos fabricantes que preinstalasen os seus servizos de procura (Google Search) e o seu navegador (Chrome) como condición para outorgarlles a licenza de uso da súa tenda de aplicacións (Play Store). Ademais, engade, fixo certos pagos a grandes fabricantes e operadores de redes móbiles a condición de que instalasen por defecto o seu buscador, á vez que lles impediu vender teléfonos intelixentes que tivesen versións alternativas de Android non aprobadas por Google.
A investigación da Comisión, que se iniciou en abril de 2015 e un ano despois, o 20 de abril de 2016, levouna a acusar formalmente á empresa, concluíu que estas prácticas forman parte dunha "estratexia" de Google para consolidar a súa posición dominante e violan as normas de Competencia europeas.
A decisión da Comisión require ao xigante estadounidense "pór fin á súa conduta ilegal de forma efectiva en 90 días" a contar desde a decisión. "Como mínimo Google ten que parar e non reincidir en ningún destes tres tipos de prácticas (...) e tamén absterse de calquera medida que teña un fin similar ou equivalente a estas", afirma a CE. Bruxelas recordou que Google desenvolve o sistema operativo e concede as licenzas de uso de Android, que é utilizado no 80% dos teléfonos intelixentes en Europa e o mundo.
Sinalou ademais que a investigación concluíu que o buscador domina no mercado de servizos xerais de procura en internet na Área Económica Europea, e a nivel mundial (salvo en China) nos de licenzas de sistemas operativos para teléfonos móbiles e tendas de aplicacións para Android, con máis dun 90% de cota de mercado en todos eles.
A decisión da CE vai dirixida a Google e a Alphabet, a súa matriz.
Como resposta á multa, Al Verney, portavoz da multinacional, declarou nun comunicado que "Android creou máis liberdade de elección para todos, non menos. Un ecosistema vibrante, innovación rápida e prezos máis baixos son as características clásicas dunha competencia sólida. Recorreremos a decisión da Comisión".
