Máis candidatos que nunca, pero aínda ningunha muller, nun debate no que as cabezas de lista dos principais partidos que aspiran a dirixir o país a partir do próximo 10-N, non dubidaron en profundar no que os diferencia, difuminando a posibilidade de que se materialicen pactos fáciles.
Se hai seis meses só o moderador do debate, entón o pontevedrés Xabier Fortes, mencionou a Galicia no seu saúdo inicial, nesta ocasión os candidatos repartiron chiscadelas aos cidadáns de distintas comunidades, entre elas a galega, afastándose por momentos da cuestión catalá e pondo o foco na situación das distintas comunidades.
Ben a través das alusións ao Estado de Autonomía ou do problema demográfico, que constitúe para a totalidade dos candidatos un dos principais problemas a combater nos próximos anos, Galicia asomou a cabeza entre as intervencións dos cinco líderes, aínda que de esguello.
Así, Pablo Iglesias aludiu directamente aos produtores lácteos galegos "prexudicados polas decisións que se toman en Europa". Tamén o candidato de Vox citou a Galicia, nesta ocasión para reprochar ao presidente da Xunta, Núñez Feijóo, a súa frase: "Galicia é unha nación de nacións" e apuntar que o Estado de Autonomía, "fracasou, fíxonos desiguais", dixo antes de propor a súa abolición.
"O 35% dos indecisos terao difícil para aclararse tras o debate"
Fixo referencia á riqueza lingüística e ao valor do "galego" o candidato de Unidas Podemos. Incluso o presidente en funcións pasou (no bico dos pés) pola crise industrial que vive Galicia ao citar a necesidade de executar unha transición enerxética nas centrais térmicas, en alusión clara a As Pontes. "Non vos imos deixar sos", manifestou Sánchez, que non levantou a mirada dos papeis.
"Están moi preocupados pola demagoxia enerxética", reprochoulle un Pablo Casado.
O xornalista Vicente Vallés recordou aos líderes dos partidos que o 7% dos indecisos decidira o seu voto tras o debate nas pasadas eleccións. Non ocorrerá nesta ocasión. O 35% dos votantes que este luns non tiñan claro que facer o 10-N fóronse á cama aínda máis cansados se cabe dos políticos deste país. Nun momento no que a recesión económica chama á porta, coas luces de urxencia climática, demográfica e de desigualdade acesas, canto máis altura se esixe aos políticos, asistimos a un debate mediocre no que o máis alto debeu de ser o caixón que pediu Rivera antes de empezar, para polo menos poder mostrar o seu lastro aos espectadores.
