O presidente de Ciudadanos, Albert Rivera, anunciou a incorporación do ex avogado do Estado Edmundo Bal ás listas da formación para as eleccións xerais do 28 de abril.
Bal, que defendeu acusar o delito de rebelión aos líderes independentistas, foi destituído polo Goberno como xefe do Penal dos servizos xurídicos do Estado ao oporse ao criterio de acusar aos líderes do 'procés' polo delito de sedición.
Durante un acto da formación en Majadahonda (Madrid), Rivera detallou que Bel irá como número catro na lista de Ciudadanos ao Congreso por Madrid.
Bal, que tomou a palabra no acto, asegurou que fora noticia nos xornais "por un acto inxusto, por cumprir coa obrigación dunha persoa honrada". "Cesáronme porque quería que mentise e negueime. Síntome especialmente cómodo neste proxecto concreto", afirmou.
Rivera cualificou a Bal de "heroe" e xa anunciara esta mañá a través de Twitter a súa "ilusión" ante o anuncio da nova incorporación. "Un dos días máis especiais desde que entrei en política", escribiu.
O líder da formación laranxa anunciou este sábado que o exvicepresidente global de Coca-Cola Marcos de Quinto sería o número dous da formación por Madrid nas eleccións xerais.