Antonio Manuel Guerrero, un dos membros da Manada, condenados polo Tribunal Supremo a 15 anos de prisión, perderá a súa condición de garda civil á máxima brevidade posible.
Así o indicaron a Efe fontes da Dirección Xeral do instituto armado, que sinalaron que unha vez que a sentenza é firme, pódense iniciar os trámites para iso.
A Dirección Xeral quere resolver o expediente coa "máxima celeridade", aínda que terá que levar a cabo todos os trámites que prevé a normativa e a lei de procedemento administrativo común das administracións públicas.
Ata agora, Guerrero non puido ser expulsado do corpo porque é garda civil de carreira e, xa que logo, había que esperar a que a condena fose firme para poder tramitar a súa saída desta forza de seguridade.