O director do Centro de Coordinación de Alertas e Urxencias Sanitarias, Fernando Simón, asegurou que cruzarse cunha persoa durante un paseo "non é un risco" de contaxio do coronavirus, xa que para que exista debe pasar un pouco máis de tempo.
Durante a rolda de prensa diaria, Simón destacou a importancia de manter o distanciamento social, especialmente en lugares pechados como, por exemplo, os transportes públicos, aínda que insistiu en que a nivel xeral cruzarse cunha persoa pola rúa non supón un risco de infección.
Dito isto, o director do Centro de Coordinación de Alertas e Urxencias Sanitarias pediu á poboación non esquecerse "tan rápido" do vivido nas últimas semanas pola pandemia do coronavirus, que en España xa matou a máis de 26.900 persoas e que cada día segue provocando a morte de máis de 100 persoas.
"Non podemos esquecer todo isto nunha semana. Unha cousa é que vaiamos progresivamente de camiño á normalidade grazas ás medidas de transmisión tan restritivas que adoptamos, pero non podemos esquecer todo tan rápido. É necesario alargar aínda unhas semanas máis esa percepción de risco, porque unha persoa pódese contaxiar pero pode facer que outros falezan", avisou.
