Arrinca a última semana do xuízo do procés no Tribunal Supremo e faino cos informes finais das defensas, que tratarán de contrarrestar as teses das acusacións e insistirán na petición de absolución para os acusados. Abriu a quenda, este martes, Andreu Van den Eynde, avogado de Oriol Junqueras e Raül Romeva, quen censurou que se aplique o Código Penal " disidencia política" no xuízo do procés, no que ao seu parecer, está a perseguirse penalmente "unha ideoloxía" e o movemento político independentista.
"O que se persegue é unha ideoloxía e por iso se criminaliza expresala internacionalmente, facer resolucións políticas e demostrala en votacións", subliñou o avogado defensor do exvicepresidente da Generalitat e do exconseller de Acción Exterior. O letrado centrou o seu informe final en atacar as orixes dunha causa que considera prospectiva e xeral contra o movemento independentista.
Van den Eynde denunciou a "vulneración dos dereitos" na causa e mostrouse moi crítico coas acusacións, entre elas a Fiscalía, da que acusa o seu "rumbo e esaxeración" nun procedemento que comezou en 2015 por orde do ministerio público sen que, ao seu xuízo, a Policía soubese concretamente os delitos que estaba a investigar.
Para o avogado, ás acusacións "non lles gusta a realidade" senón que "falan da apocalipse" cun vocabulario que fai referencia ás "miradas de odio, o asedio, a devastación" sen baixar á proba: "Non a coñecemos, non está contradita e a pouca que vén aquí tense que defender".
Tamén criticou o papel "moi perigoso" da Avogacía do Estado, que foi "capaz de enfrontarse á Fiscalía" para defender a súa tese de sedición e con iso meteuse nun "berenxenal monumental porque é quen defende o Código Penal da disidencia política".
"Fai bandeira da resposta penal á xente, e a iso dedícase, decántase pola represión penal", sinalou o letrado, que tamén reprochou o "marco ultra" que introduciu Vox, acusación popular, no xuízo e que, entende, "non influirá no tribunal".
Restou valor ao Libro Branco da Transición Nacional de Cataluña —impulsado por JxSí e a CUP que trazaba o proxecto de independencia— e ao documento Enfocats, que contiña a suposta folla de ruta á independencia, ao que se referiu como "un panfleto" e un "pretexto que se alza como proba de cargo" por repetilo "mil veces", pero que só é "fume".
Se se cumpre o calendario previsto, este mércores será a quenda da última palabra dos acusados, que nun máximo de 15 minutos farán unha alegación á súa inocencia, comezando polo exvicepresidente da Generalitat Oriol Junqueras.
