O Defensor do Pobo, Francisco Fernández Marugán, dixo este luns que o principio de neutralidade ideolóxica propio dunha sociedade pluralista é "incompatible coa presenza nos edificios e espazos públicos de símbolos dunha ideoloxía".
Sinalouno nunha declaración institucional, ante os recentes acontecementos en Cataluña, e na que mostrou "a súa preocupación pola deterioración da convivencia nos espazos públicos cataláns".
Ademais, reclamou aos poderes públicos de Cataluña que respecten "o principio de neutralidade ideolóxica que debe rexer calquera sociedade libre, aberta, democrática e tolerante".
Condenou as agresións sufridas por unha cidadá que retiraba lazos amarelos en Barcelona e por un traballador de Telemadrid no transcurso dunha manifestación e desexou que a próxima Xunta de Seguridade Estado-Generalitat (este xoves) aborde a situación derivada do uso e retirada de símbolos de contido ideolóxico nos espazos públicos.
Un Estado de Dereito está sometido a regras de diverso contido para garantir que sexa "un espazo compartido", segundo Fernández Marugán, que argumentou: "Os dereitos de reunión e manifestación ou o de uso dos espazos públicos non son ilimitados precisamente para preservar a seguridade e a convivencia".
MEDIDAS. Recordou que a institución xa comezou a recibir e tramitar queixas sobre o uso de símbolos ideolóxicos nos edificios públicos.
O pasado 7 de agosto amparou a un cidadán que se queixaba da instalación de lazos amarelos na fachada principal do Hospital de Santa Creu i Sant Pau de Barcelona.
O Defensor escribiu á Conselleira de Saúde da Generalitat afirmando que "a liberdade de expresión das persoas en instalacións públicas ten un límite no principio de neutralidade ideolóxica dos poderes públicos, que non son partidos políticos ou entidades da sociedade civil".
"Os poderes públicos deben respectar o principio de neutralidade ideolóxica propio dunha sociedade pluralista"
"Os cidadáns que acoden a elas (hospitais, instalacións policiais, delegacións de Facenda e un longo etcétera) teñen unha pluralidade de posicións sobre as máis diversas cuestións, todas as cales deben ser respectadas sen que ninguén poida sentirse molesto ou alleo á institución pública de que se trate, que é de todos e para todos", salientou o Defensor.
ESPAZOS PÚBLICOS. O 30 de agosto o deputado de Cidadáns Juan Carlos Girauta solicitou a intervención do Defensor para a investigación ou esclarecemento de actos, resolucións e condutas concretas producidas nas Administracións Públicas, que afecten a un cidadán ou grupo de cidadáns".
Girauta facía referencia –continúa o Defensor– á ocupación das sedes físicas oficiais ou dependencias da Administración da Generalitat ou do Govern, así como dos Concellos, con símbolos (lazos amarelos, cruces, pancartas, esteladas). representativos ou vinculados a unhas determinadas ideas políticas.
Achegábanse fotografías de instalacións da Generalitat así como dos Concellos de Barcelona, Xirona, Reus, Vic e Berga.
Ante estes feitos, o Defensor reiterou: "Os poderes públicos deben respectar o principio de neutralidade ideolóxica propio dunha sociedade pluralista".
"Iso é incompatible coa presenza nos edificios públicos –máxime tendo en conta que é permanente– de símbolos propios dunha ideoloxía, o respecto á cal debe cohonestarse co respecto ás demais que concorren nunha sociedade libre, aberta, democrática e tolerante", aclarou.
O Defensor asegurou que, ademais de tramitar as queixas que reciba sobre estes asuntos, amparará, no seu caso, aos cidadáns e entidades afectados.
"O Dereito, expresión dunha ética pública, compartida e vinculante, debe prevalecer", segundo Fernández Marugán, que desexou que a Xunta de Seguridade Estado-Generalitat que se celebrará este xoves en Barcelona aborde a situación "derivada do uso e retirada de símbolos de contido ideolóxico nos espazos públicos".
