Un policía que arrestou dous menores de 6 anos, entre eles unha nena que foi esposada e enviada a un centro de detención xuvenil logo de sufrir unha rabecha nunha escola primaria, foi despedido, segundo informou este martes a Policía de Orlando (Florida). O axente da escola Lucious and Emma Nixon Elementary foi despedido tras unha breve investigación de dous feitos illados, que resultaron no arresto dos menores.
"En nome do Departamento de Policía de Orlando, descúlpome cos nenos involucrados e as súas familias", declarou na súa conta de Twitter Orlando Rolón, xefe da Policía de Orlando.
Statement from OPD Chief Orlando Rolón. pic.twitter.com/qd7msBx0Fw
— Orlando Police (@OrlandoPolice) September 23, 2019
O axente Dennis Turner arrestou o xoves pasado a Kaia Rolle tras portarse mal na aula e protagonizar unha rabecha nas oficinas da escola, e enviouna ao Centro de Avaliación de Menores en Orlando por agresión. Nese centro tomáronlle as impresións dixitais e fixéronlle as tradicionais fotografías policiais, para incredulidade da avoa da pequena.
A muller, Meralyn Kirkland, escusou o comportamento da súa neta, que foi liberada e atópase en casa coa familia, ao asegurar que ten falta de horas de descanso como consecuencia dunha apnea do soño. "Ela ten unha condición médica que estamos a traballar para resolver", dixo Kirkland ao axente Turner cando puido falar con el. "Entón el dime: 'Eu teño apnea do soño e non me comporto así'".
"Como avó, podo entender o traumático que foi isto para todos os involucrados", expresou Rolón. A súa oficina detallou que Turner detivo ese mesmo día outro menor, que foi posto en liberdade logo de ser procesado no centro de detención xuvenil.
Segundo a axencia local da orde, antes de que un dos seus oficiais deteña un menor de 12 anos debe recibir aprobación por parte dun supervisor, cousa que Turner nunca fixo.
A fiscal do estado polo Noveno Circuíto, Aramis Ayala, sinalou que non presentará cargos contra os nenos e que a súa oficina traballa para limpar os seus expedientes.
