Un xuíz de Barcelona deixou a un paso do xuízo ao director do semanario satírico El Jueves e ao da súa páxina web, ao considerar que a publicación dunha sátira que chanceaba con que os policías nacionais consomen cocaína supón "unha ofensa e unha falta de respecto" aos membros do corpo.
Nun auto, a titular do xulgado de instrución número 20 de Barcelona acorda continuar o procedemento contra os directores da revista e dá un prazo de dez días á Fiscalía e ás acusacións para que presenten os seus escritos, paso previo a enviar o caso a xuízo.
A causa abriuse por mor dunha denuncia presentada por un sindicato da Policía Nacional por unha sátira que El Jueves publicou en outubro de 2017, coincidindo co despregamento de axentes antidisturbios dese corpo para impedir o referendo do 1-O suspendido polo Constitucional.
O artigo, acompañado de ilustracións, chanceaba con que os axentes antidisturbios despregados acabaran coas existencias de cocaína en Cataluña, tras impedir "a porrazo limpo" o referendo do 1-O.
Para o xuíz, os textos e ilustracións publicados pola revista satírica "levaron unha ofensa e unha falta de respecto aos membros do Corpo da Policía Nacional, sen que nin uns nin outras tivesen sustento en base fáctica de clase algunha".
Por ese motivo, ve indicios para enviar a xuízo aos responsables da revista, que están imputados por un delito de inxurias por mor da denuncia presentada polo sindicato policial.
