Os exconsellers presos Oriol Junqueras, Raül Romeva, Dolors Bassa, Jordi Turull, Josep Rull e Joaquim Forn foron recibidos na mañá deste martes con aplausos e berros de "liberdade" á súa chegada ao Parlament para comparecer na comisión de investigación sobre a aplicación do artigo 155 da Constitución española. Foi o que se empregou para a intervención da autonomía.
Os líderes independentistas, condenados a prisión pola súa implicación na organización do referendo do 1-O e a declaración de independencia posterior, chegaron en dúas quendas e foron recibidos por unha comisión encabezada polo presidente da Generalitat, Quim Torra, e o do Parlament, Roger Torrent.
Durante a comparecencia na Cámara catalá, Junqueras e os exconsellers estarán custodiados polos Mossos, como se fai sempre cando un preso sae dun centro penal e, unha vez finalizadas as declaracións, regresarán ás súas respectivas prisións baixo custodia policial a última hora da tarde. Para esta comparecencia excepcional de presos do 1-O, que foi autorizada polo departamento de Xustiza, os Mossos d'Esquadra blindaron os accesos á Cámara catalá.
Esta comparecencia prodúcese nun clima enrarecido entre JxCat e ERC, despois de que este luns Torrent retirase o voto na cámara ao president Quim Torra en aplicación das resolucións da Junta Electoral Central e o Tribunal Supremo.
