A exhumación de Franco será antes do 25 de outubro

Efe

11/oct./19 - 15:23 Actualizado: 12/oct./19 - 18:15

Seguinte

Os restos de Francisco Franco serán exhumados do Val dos Caídos antes do 25 de outubro, data tope que se fixou o Goberno para afastala da campaña electoral, mentres que o día exacto será comunicado á familia do ditador con 48 horas de antelación por se desexa estar presente.

Así o avanzou en rolda de prensa no Palacio da Moncloa a vicepresidenta en funcións, Carmen Calvo, que informou de que na basílica do Val dos Caídos só estará presente a ministra de Xustiza, Dolores Delgado, como notaria maior do reino, que levantará acta, así como o persoal necesario para a exhumación.

A basílica pecharase ao público xa desde este sábado, segundo informaron fontes do Goberno, para preparar o proceso.

O custo da exhumación e posterior reinhumación no cemiterio do Pardo/Mingorrubio achégase aos 11.000 euros, unha cantidade que as fontes non consideran elevada para a magnitude e a importancia da operación.

Unha cautelar improbable

O Constitucional decide a principios da próxima semana se acorda ou non a paralización da exhumación dos restos de Franco que o Goberno vai realizar antes do 25 de outubro, aínda que se trata dunha posibilidade remota á vista das poucas medidas cautelarísimas que acorda este tribunal.

Fontes xurídicas explicaron a Efe que se trata da última manobra legal dos netos do ditador para impedir a exhumación con carácter inmediato, aínda que as expectativas non apuntan a iso.