Seis nenos e tres adultos, a maioría refuxiados procedentes de Iraq, Siria e Etiopía, resultaron feridos a noite do sábado en Boise (Idaho, noroeste de EE.UU.) ao ser apuñalados por un sospeitoso que foi detido, informou este domingo a Policía local.
Un home de 30 anos, identificado como Timmy Kinner, irrompeu na festa de aniversario dunha nena de 3 anos nun edificio de apartamentos de Boise e apuñalouna a ela e a outros cinco nenos, dous deles de 4 anos, un de 6, outro de 8 e un último de 12.
Kinner tamén feriu a tres adultos que trataron de protexer aos nenos, segundo explicou nunha conferencia de prensa o xefe de Policía de Boise, William Bones. "As nosas vítimas son algúns dos membros máis novos da nosa comunidade. Son vítimas que fuxiron da violencia en Siria, Iraq e Etiopía", afirmou Bones, quen non confirmou se todos e cada un dos nove afectados son refuxiados.
Polo menos catro das vítimas teñen feridas graves e nalgúns casos son de tal calibre que lles "cambiará a vida", asegurou o xefe de Policía, visiblemente emocionado. "Este é un ataque contra os máis vulnerables, os nenos", dixo.
Bones explicou que Kinner, quen é estadounidense, aloxouse temporalmente nun edificio de apartamentos para familias de baixos ingresos onde viven moitos refuxiados, pero "debido ao seu comportamento, pedíraselle que se fora".
Un día despois de irse, Kinner volveu para "vingarse" e a Policía cre que se ensañou co primeiro obxectivo que atopou no edificio, a festa de aniversario da nena. "Non temos probas concretas para crer que foi un crime de odio, pero seguimos investigando", indicou Bones. Kinner foi arrestado a noite do sábado e acusado de nove cargos por asalto grave e outros seis por ferir a nenos.
O alcalde de Boise, Dave Bieter, subliñou que a pequena cidade de pouco máis de 200.000 habitantes sempre foi "acolledora" cos refuxiados e inmigrantes, e pediu "reafirmar os valores" que permitiron dar a benvida a tantos, ao recordar que os seus propios avós chegaron alí desde o País Vasco.
