A presión sobre a ministra de Xustiza, Dolores Delgado, para que dimita polas súas conversacións co excomisario Villarejo, nas que chamaría "maricón" ao seu compañeiro Fernando Grande-Marlaska, aumentou nas últimas horas. Primeiro foi o líder de Podemos, Pablo Iglesias, o que pediu que se afaste da vida política. E despois os senadores do PP entoaron o berro de "dimisión" durante a intervención da ministra na Cámara alta, na que falaba sobre indultos e recordaba que o seu antecesor no cargo, Rafael Catalá, e o fiscal xeral do Estado falecido, José Manuel Maza, foron reprobados.
"Alguén que se reúne de xeito afable cun personaxe do lixo das cloacas de Interior no noso país debe afastarse da vida política porque fai dano á maioría parlamentaria que protagonizou a moción de censura", dixo nos corredores do Congreso o líder de Podemos, principal apoio do Goberno de Pedro Sánchez.
Iglesias, que sinalou que non tivo ocasión de dicirllo ao presidente do Goberno, de viaxe oficial en Estados Unidos, afirmou: "Calquera político que se mesture con iso debería afastarse dunha función pública que debe ser nobre. Creo que estou a ser cristalino".
O Goberno, en palabras da vicepresidenta Carmen Calvo e da portavoz Isabel Celaá, apoiou á titular de Xustiza. "Perfectamente se vai manter" no Executivo, dixo Calvo, mentres que Celaá subliñou que o Goberno "ten confianza plena" en Delgado e tachou de "manipulación" as gravacións dunha comida que compartiu co excomisario José Villarejo en 2009.
Segundo as gravacións, difundidas polo diario dixital moncloa.com, creado este mesmo mes e dirixido polo xornalista Joaquín Vidal, Delgado cualificou de "maricón" ao entón maxistrado da Audiencia Nacional e actual ministro do Interior, Fernando Grande-Marlaska.
A ministra dixo ser vítima de ataques "execrables" e dixo que non se difundiu o audio enteiro da comida, senón "trociños solapados". "As gravacións córtanse, péganse, ponse e quítanse", advertiu antes de prometer que chegará "ao fondo do asunto".
A Confederación LGTBI+ Colegas si pediu á ministra que pida desculpas públicas no Parlamento a Marlaska.
