España contará por primeira vez desde 2019 cun calendario de vacinas único para toda a vida que incluirá 10 vacinas que inmunizan fronte a 14 enfermidades, segundo acordaron este xoves o Ministerio de Sanidade e as comunidades autónomas.
O acordo produciuse no Consello Interterritorial de Saúde, presidido pola ministra Sanidade, María Luisa Carcedo, no que tamén se deu luz verde ao plan de terapias innovadoras CAR-T, aínda que quedou no aire como se van financiar estes tratamentos que teñen un alto custo económico -case medio millón de euros-, a pesar das reivindicacións dos conselleiros.
A ministra destacou a importancia do acordo sobre o calendario de vacinas, que ten o "valor engadido" de que en todas as comunidades se van administrar as mesmas vacúas, o que suporá un mellor control das enfermidades.
A "novidade", segundo Carcedo, é que ao calendario infantil únense os grupos de risco e a poboación maior de 18 anos. A este colectivo administraránselle "doses de recordo dalgunhas vacinas infantís e rescatarase" a aqueles que no seu momento quedaron fóra da vacinación oficial, como, por exemplo, as nenas non vacinadas do Virus do Papiloma Humano (VPH). Para os maiores de 65 anos o calendario inclúe as vacinas da gripe e do neumococo.
Carcedo recoñeceu que o plan estratéxico das terapias CAR-T, unha inmunoterapia que modifica unhas células do sistema inmunolóxico do paciente para combater a actividade de determinados tumores hematolóxicos, foi un dos temas que máis debate suscitou. Explicou que ten como obxectivo o acceso equitativo, seguro e planificado a estes tratamentos dentro do Sistema Nacional de Saúde.
Tres son as terapias existentes, dúas delas desenvolvidas pola industria farmacéutica e aprobadas pola Axencia Europea do Medicamento, e unha terceira, froito da investigación pública, que está a aplicar o Hospital Clinic de Barcelona nun ensaio clínico.
Os conselleiros pediron a Sanidade que aclare como se van financiar estas terapias, un dos maiores avances das últimas décadas no tratamento do cancro de sangue. Entre as propostas que se puxeron sobre a mesa figuran a recuperación do fondo de cohesión que eliminou o goberno do PP ou traballar coa industria na fórmula do risco compartido.
A ministra explicou que a introdución destas terapias "non debe quedar ao albur dos mercados" e non pode supor "un lastre" para o SNS, e sinalou que ao tratarse de medicamentos que teñen a súa orixe na investigación pública pódese negociar "de xeito máis favorable coa industria". "Desde o sistema de saúde temos capacidade para afrontalo", subliñou.
Estas terapias aplicaranse a través dos centros estatais de referencia, indicou a ministra, quen insistiu en que se trata dun "medicamento máis" do SNS e a súa introdución responderá a decisións moi acordadas cos profesionais sanitarios. En calquera caso, farase de forma "homoxénea en todo o país".
O plan para combater a pseudoterapias, presentado este mércores pola ministra de Sanidade e o titular de Ciencia, Innovación e Universidades, Pedro Duque, foi outro dos temas que analizaron os representantes do Ministerio e das comunidades autónomas. A maior parte dos conselleiros lamentaron que a orde do día non incluíra o financiamento sanitario, un asunto sobre o que algunhas comunidades pediron un consello monográfico, nin tampouco o déficit de profesionais sanitarios.
No encontro tamén se acordou o financiamento do sistema de monitorización da glicosa mediante sensores (tipo flash) para determinados adultos, así como a micropigmentación da areola mamaria e da mamila, implantes cocleares e accesorios auditivos para xordeiras severas.
O Ministerio informou ás comunidades do impulso que quere dar á Estratexia Naves contra a obesidade mediante a adopción de determinadas medidas como a implantación da etiquetaxe frontal de cinco cores nos alimentos e bebidas que identificará a calidade nutricional dos produtos.
