O Goberno ten previsto convocar este ano unhas 30.844 prazas na Administración Xeral do Estado este ano no que será a maior oferta de emprego público da década e que suporán a creación de 1.909 novos postos de traballo.
O Consello de Ministros aprobou este venres varias ofertas públicas de emprego dun total de 23.156 prazas que, sumadas ás xa convocadas este ano, suporán unha oferta total de 30.844, segundo explicou este venres a ministra de Política Territorial e Función Pública, Meritxell Batet.
En concreto, o Goberno aprobou un real decreto para unha oferta de emprego ordinaria de 17.299 prazas, das que 11.095 será de novo ingreso e 6.204 de promoción interna, grazas ás que se crearán 1.909 empregos netos, a maior cifra desde 2009 e un 58 % superior á do ano pasado.
Isto débese a que as taxas de reposición son 115 % nas Forzas e Corpos de Seguridade, do 100 % nos sectores prioritarios e do 75 % no resto, en tanto que se engadiu un 5 % adicional para determinados sectores da Administración.
Os servizos sociais e o I+D+i cobran protagonismo
Os sectores prioritarios son os servizos públicos de atención ao cidadán, a asistencia directa a usuarios dos servizos sociais, os de I+D+i ou de atención para prestacións de desemprego.
Tamén os servizos destinados a atender necesidades urxentes en materia de asilo e refuxio, de loita contra a fraude fiscal e laboral e a administración penal.
Así mesmo, o Consello deu o visto e prace a un real decreto para convocar unha oferta de emprego extraordinaria destinada á atención a asilados e refuxiados, con 323 prazas, dando resposta así ás reivindicacións e demandas das ONGs, explicou Batet.
Desta forma, o Goberno pretende dar resposta ao desafío dos novos fluxos migratorios é necesaria a incorporación urxente de novos efectivos adicionais aos ámbitos onde se están xestionando actualmente as peticións de asilo e refuxio.
"É unha oferta extraordinaria que resulta clave para mellorar do sistema de acollida e para impulsalo como un sistema xusto, integrador e eficiente", tal e como aseguraron desde o Ministerio de Política Territorial e Función Pública.
BENEFICIOS PARA O PERSOAL TEMPORAL. O Goberno tamén deu luz verde a un real decreto para dar estabilidade ao persoal temporal da Administración, mediante unha oferta correspondente a 2017 que non fora convocada, que permitirá converter en fixas 2.862 prazas interinas da Administración Xeral do Estado.
Batet recordou o compromiso asinado de aprobar outra oferta de estabilización de interinos, o referente a 2018, nun prazo de seis meses.
Este real decreto inclúe tamén outras 2.672 prazas para a consolidación do persoal da Administración de Xustiza.
En total, todas estas ofertas suman 23.156 prazas para a Administración Xeral do Estado que, sumadas ás 7.688 convocadas en abril para docentes, Forzas Armadas e Forzas e Corpos de Seguridade do Estado, supoñen que a oferta do Estado para 2018 alcance un total de 30.844 prazas.
Entre os decretos aprobados inclúese un para recuperar o 100 % da retribución en casos de incapacidade temporal, reducido durante a crise ata o 50 % durante os 4 primeiros días e o 75 % os 15 seguintes.
"Con todo iso, trasladamos a recuperación económica non só ao ámbito salarial senón ao emprego", así como o reforzo na "prestación de servizos públicos de calidade", subliñou Batet.
