A ministra de Justicia, Dolores Delgado, avanzou este mércores que o Goberno estudará o xeito de ilegalizar as asociacións ou organizacións que fagan apoloxía do franquismo, dentro dunha serie de medidas que comprenden tamén unha reforma "integral" da Lei da Memoria Histórica de 2007.
Delgado fixo este anuncio na súa comparecencia ante a comisión de xustiza do Congreso para presentar as súas liñas de actuación, na que dedicou un apartado ao tema da memoria histórica porque "é inaceptable", dixo, que "España siga sendo o segundo país do mundo en número de desaparecidos despois de Cambodia".
A ministra afirmou que é necesario actualizar a lei de 2007 para "declarar a nulidade dos tribunais de excepción franquistas e os seus fallos e sentenzas, impulsar desde o público as exhumacións, crear unha Comisión da Verdade e resignificar o Val dos Caídos nos termos recomendados pola comisión de expertos que estudou o asunto en 2011".
Esta comisión impulsada polo Goberno de José Luis Rodríguez Zapatero recomendou que os restos do xeneral Francisco Franco, enterrados neste lugar, sexan trasladados ao sitio que designe a familia ou, no seu caso, ao que se considere digno e máis adecuado.
Dentro desta reforma da Lei de Memoria Histórica é tamén intención do Goberno, explicou, "retirar a simboloxía de exaltación da Guerra Civil e a ditadura, cun procedemento taxado con sancións económicas para o caso de incumprimento".
Para rematar, anunciou que o Executivo reabrirá a Oficina de Apoio ás Vítimas do Franquismo. "Non pode ser que persoas con máis de noventa anos se desesperen intentando recuperar os restos dos seus pais, dos seus familiares, ante a negativa dun xuíz ou a arbitrariedade dun concello", asegurou Delgado.
Para a ministra é inconcibible tamén que "haxa miles de vítimas en España afectadas de indefensión xudicial" e que teñan que acudir a outro país para que se lles escoite.
Recordou que o Goberno estableceu unha nova Dirección Xeral para a Memoria Histórica que establecerá plans de procura de desaparecidos e publicará un censo oficial de vítimas da Guerra Civil, entre outras cousas.
