O Goberno e a Generalitat acordaron este xoves garantir a neutralidade no espazo público, segundo o ministro Fernando Grande-Marlaska, que indicou que os Mossos d'Esquadra saben que deben actuar para que non estea "monopolizado" por unha ideoloxía, en plena polémica polos lazos amarelos.
Nunha comparecencia conxunta co conseller de Interior, Miquel Buch, tras unha reunión de dúas horas da Xunta de Seguridade de Cataluña, o ministro de Interior, que non deu detalles de como se aplicará este compromiso, insistiu en subliñar a importancia de que os espazos públicos "sexan de convivencia e de encontro, e non de desencontro" e que os Mossos d'Esquadra "teñen parámetros" para garantilo.
Pola súa banda, o conseller Buch, sen referirse ao compromiso anunciado polo ministro, nin concretar tampouco como se garantirá a neutralidade, precisou que a Generalitat non considera que exista un "problema de convivencia" en Cataluña e asegurou que os Mossos intervirán cando alguén "busque algo máis que un debate".
No entanto, lamentou que a partir da segunda quincena de agosto, "un partido determinado", en alusión a Cidadáns, fixo chamamentos para sacar lazos amarelos, o que provocou "máis actividade" neste sentido, ante o que pediu que non caia en "provocacións" e que, se hai enfrontamento, se chame aos Mossos.
LAZOS AMARELOS. A polémica polos lazos amarelos foi un dos asuntos tratados na reunión da Xunta de Seguridade de Cataluña, presidida polo presidente da Generalitat, Quim Torra, xa que o primeiro punto da orde do día dedicouse, a instancias do Ministerio, a analizar a convivencia no espazo público.
Na rolda de prensa conxunta posterior ao encontro no Palau da Generalitat, Marlaska salientou o compromiso de lealdade "institucional" entre Goberno e Generalitat en prol da seguridade cidadá e resaltou a colaboración que houbo e seguirá habendo entre as forzas de seguridade do Estado e os Mossos.
En relación aos lazos amarelos, o ministro subliñou que lle preocupa que haxa enfrontamentos na rúa pola colocación e retirada dos símbolos e apuntou que se debe facer un uso "adecuado" do espazo público para que "todo o mundo poida exercer os seus dereitos e liberdades".
Neste sentido, resaltou que existe un compromiso da Generalitat e dos Mossos para garantir a "neutralidade" dos espazos públicos, que teñen que ser "para o encontro e non monopolizados por ninguén".
Con todo, o ministro non concretou como se procederá para garantir esa neutralidade nos espazos públicos, tarefa que deixou en mans da policía catalá: "Os Mossos teñen os parámetros para garantir esta orde publico en primeiro lugar, e o meu convencemento é que así será".
A continuación, Buch matizou que, ao seu xuízo, non existe un "problema de convivencia" en Cataluña, pediu non caer "en provocacións" e subliñou que os Mossos deberán intervir cando "alguén busca algo máis que un debate" no espazo público.
