O Ministerio de Sanidade notificou este mércores 10.491 casos máis de coronavirus, dos que 5.075 foron confirmados nas últimas 24 horas, un 46% deles de Madrid. Así as cousas, a cifra total de contaxios elévase a 835.901, e a de falecidos a 32.562, con 76 decesos máis.
Os datos facilitados a Sanidade polas comunidades indican que Madrid é a que rexistra o maior número de contaxios novos, 2.853 respecto dos datos do martes e 2.325 nas últimas 24 horas. A pesar do avultado das cifras, a repunta do cómputo total de casos da comunidade é sensiblemente inferior á anotada o martes, cando sumou máis de 5.000 positivos á lista.
Tras Madrid, as autonomías con máis novos casos correspondentes ás últimas 24 horas son Andalucía, con 473 novos positivos confirmados o martes; Aragón, con 395, e Navarra, con 253. Ademais, Extremadura informa de 215 novos positivos; Murcia e Galicia, de 211 cada unha; Cataluña, de 198; Asturias, de 119; La Rioja, 111; Canarias, 110; Comunitat Valenciana, 106; Castilla-La Mancha, 94; Castilla y León, 92; País Vasco, 57; Cantabria, 43; Balears, 31; Ceuta, 21, e Melilla, 10.
Case un 18% das camas de Uci dispoñibles en España están ocupadas por pacientes con covid, taxa que supera o 40% en Madrid
No que respecta á presión hospitalaria, a data de 6 de outubro había 10.692 enfermos de covid ingresados nos hospitais españois —catro menos—, o que deixa unha porcentaxe de ocupación das camas do 8,97%. A taxa de Galicia, con 242 ingresos, é bastante inferior, dun 2,99%.
Nas unidades de coidados intensivos atopábanse 1.568 persoas en toda España (24 máis), o que supón un índice de ocupación do 17,85%, dúas décimas máis. Madrid é a comunidade con maior presión nas unidades de coidados intensivos, cunha ocupación dun 40,36%, dúas décimas menos que o luns. A taxa galega é do 5,2%.
INCIDENCIA. Nos últimos 14 días, España contabiliza 257 casos por cada 100.000 habitantes, unha taxa algo inferior á do martes. Por comunidades, a maior incidencia acumulada rexístraa Navarra, aínda que baixa a 648, seguida de Madrid, que ten un 591,16 fronte ao 710,28 anterior. A taxa galega é de 104.
Na rolda de prensa posterior á reunión do Consello de Goberno, Augado precisou que a Comunidad de Madrid permitirá que as discotecas, as salas de baile e os bares de copas se poidan equiparar ao sector da restauración de forma temporal durante estes meses de restricións, se eles queren e cumpren os requisitos necesarios.
O tamén portavoz do Goberno rexional indicou que moitos destes locais seguramente non pensaban nesta alternativa cando abriron os seus negocios e agora pode ser "un salvavidas" para moitos deles tras o seu peche, decretado polo Goberno rexional a finais de agosto.
