O secretario xeral de Podemos, Pablo Iglesias, falou este domingo pola tarde por teléfono co expresidente catalán Carles Puigdemont, ao que considera un "interlocutor importante independentemente da súa situación procesual", segundo anunciou na súa conta de Twitter, onde afirmou que "considerará" unha reunión presencial con el.
Acabo de hablar por teléfono con Carles Puigdemont. Hemos conversado durante 45 minutos.
— Pablo Iglesias (@Pablo_Iglesias_) 21 de outubro de 2018
O líder de Podemos informou a través desta rede social que durante a conversación, que se prolongou por espazo de 45 minutos, Iglesias e Puigdemont conversaron sobre "a situación dos presos políticos cataláns e os exiliados" e sobre o escenario creado tras a moción de censura.
A través da súa conta persoal, o líder de Podemos recoñeceu a Carles Puigdemont como interlocutor, á marxe da súa situación procesual "e de terse exiliado", en tanto que "representa á segunda forza política nas últimas eleccións catalás e á primeira da coalición que goberna en Catalunya".
Iglesias explicou tamén que o expresidente catalán invitouno a ter unha reunión presencial, iniciativa que lle "agradece" e que "considerará", aínda que "polo momento" cre que o "importante" é "manter o contacto".
Ambos os políticos mostráronse de acordo na necesidade de abrir espazos de dialogo político "sen exclusión de ningún tema", espazos que "neste momento" non existen, pero "son condición de posibilidade de calquera tipo de acordo no futuro".
O secretario xeral de Podemos finalizou os seus tuits cun "seguiremos falando". Iglesias afirmou, tras entrevistarse co líder de ERC Oriol Junqueras, o pasado venres no cárcere de Lledoners, que a súa intención era de promover a distensión e o diálogo co obxectivo de favorecer acordos políticos cos dirixentes cataláns, en plena negociación dos Orzamentos para 2019.
