Polo menos 1.424 persoas morreron como consecuencia do terremoto e o tsunami que afectaron o 28 de setembro á illa indonesia de Célebes, onde aínda se busca a máis de mil desaparecidos, moitos dos cales poderían seguir sepultados entre as toneladas de cascallos deixadas pola traxedia.
O portavoz da Axencia Nacional de Xestión de Desastres (BNPB), Sutopo Purwo Nugroho, confirmou este xoves que ata o momento foron localizados 1.424 cadáveres, dos cales a ampla maioría xa foron enterrados unha vez concluído o proceso de identificación, informa a axencia de noticias Antara.
A maioría das vítimas localizadas, máis de 1.200, corresponden á zona de Palu, unha cidade que quedou arrasada por un tsunami que azoutou a costa con ondas de ata seis metros. Os servizos de urxencia tiveron problemas para acceder a outra das áreas máis afectadas, a de Dongala, polo que o balance previsiblemente subirá.
Fontes consultadas pola cadea de televisión británica Sky News aseguraron que aínda habería unhas mil persoas desaparecidas nas zonas de Balaroa, Sigi e Petobo. Nesta última zona, a maioría das vítimas estarían baixo tres metros de barro que están xa solidificados, o que complica a súa recuperación.
A comunidade internacional envorcouse coa axuda e o Goberno indonesio deixou ao carón a súa histórica reticencia a aceptar asistencia exterior. Segundo as autoridades locais, ao redor dunha vintena de países ofreceron xa a súa axuda, na que tamén colaboran axencias de Nacións Unidas e numerosas ONG.
"Hai moitos retos tras este desastre, nunca pasou algo tan malo", recoñeceu Frida Sinta, que traballa como voluntaria para que os habitantes de Palu obteñan comida e outros bens básicos. A cidade recuperou a subministración eléctrica e xa se aprecia a reapertura progresiva de tendas, segundo a axencia Reuters.
"Movemos o que podemos en coche ou moto dentro da cidade", dixo Sinta. "Aínda non chegamos a moitos lugares inaccesibles", engadiu esta voluntaria.
FALTA DE AUGA. A maioría da infraestrutura de subministración, como tubaxes, quedaron danadas polo terremoto, algo que a ONG Oxfam espera aliviar enviando a Palu equipos de tratamento de auga e kits de purificación para 500.000 persoas. A responsable humanitaria da organización, Ancilla Bere, subliñou nun comunicado que "o saneamento é unha preocupación importante", tendo en conta que en Palu e en zonas contiguas "non hai auga corrente e poucos retretes funcionan".
"A magnitude dos danos causados polo terremoto e o tsunami é enorme e existe o temor de que moitos corpos estean enterrados debaixo de casas e edificios colapsados", sinalou.
Asril Abdul Hamid, de 35 anos, viu como a súa vivenda viña abaixo froito da licuefacción do chan, unha circunstancia frecuente no caso de potentes tremores. "A miña inmediata familia está a salvo, grazas a deus, pero o meu curmán morreu", contou á axencia Reuters.