Investigan un vídeo onde disparan a fotos de Sánchez, Pablo Iglesias e Marlaska

Tamén disparan a retratos de Irene Montero e Pablo Echenique
c60809f4-8671-4324-9268-5d7938ca0977
photo_camera Captura do vídeo. TWITTER

As forzas de seguridade investigan un vídeo, difundido en redes sociais, onde ven prácticas de tiro contra fotografías do presidente do Goberno, Pedro Sánchez; do vicepresidente segundo, Pablo Iglesias; os ministros Irene Montero e Fernando Grande-Marlaska, e o dirixente de Podemos Pablo Echenique.

O vídeo foi colgado nas redes e retuiteado por miles de persoas, e no mesmo aparecen dous homes, un deles cunha arma que, nunha especie de galería de tiro, dispara contra as imaxes destes políticos e derrúbaas.

Fontes policiais aseguraron a Efe que, segundo as primeiras pescudas, a arma empregada non é a que posúen como dotación regulamentaria as forzas de seguridade.

Nas imaxes difundidas vese como un home, provisto duns cascos vermellos e de cara, levanta un dedo en sinal de burla cando acaba de disparar.

Despois a cámara mostra as imaxes dos políticos antes de ser abatidos, ao parecer cunha arma que, segundo un dos usuarios de Twitter que o colgou, "parece unha Franchi SPS 350, unha das que usa a policía".

As fontes consultadas reiteran a Efe que a arma empregada non é esta, senón que pode tratarse dunha de características moi similares e de que o lugar pode ser un club de tiro ou incluso unha nave privada habilitada para esta práctica.

Fontes do Ministerio do Interior indicaron este xoves que as forzas de seguridade abriron unha investigación e precisaron que, "como sucede en feitos que poden revestir carácteres de delito, poden actuar de oficio para identificar aos autores".

O propio Pablo Iglesias colgou o vídeo na súa conta de Twitter con este texto: "Nin sequera as ameazas de morte destes pseudocomandos da ultradereita van distraernos da nosa tarefa de reforzar a xustiza social e unha recuperación económica que non deixe a ninguén atrás. Fronte aos ultras: xustiza social, democracia, liberdade, Goberno". 

Comentarios