Os dirixentes de Unidas Podemos Pablo Iglesias e Irene Montero anunciaron na tarde deste venres na súa conta de Facebook o nacemento do seu terceiro fillo, Aitana, no Hospital Gregorio Marañón de Madrid, a cuxos profesionais se mostran agradecidos.
"Hoxe naceu Aitana. Chegou antes de tempo como é costume na familia, pero por sorte e grazas á vixilancia sanitaria, foi moito menos impuntual que os seus irmáns", refiren na conta oficial de Pablo Iglesias.
Así mesmo, dan as grazas "unha vez máis a todos os profesionais do Gregorio Marañón. O seu esforzo e a súa xenerosidade engrandecen aínda máis o mellor do noso país: a sanidade pública".
Refiren que o nome de Aitana "quere ser unha homenaxe ao exilio español e á América Latina que abrazou aquelas mulleres e homes". E recordan que "saíndo de Alacant cara ao exilio que os acabaría levando a América Latina, María Teresa León e Rafael Alberti despedíronse da súa patria mirando por última vez a Serra de Aitana chea de flores vermellas. Aquela visión inspirou primeiro o nome da filla de dous poetas e despois os de moitas máis fillas, coma a nosa".
Aitana é o terceiro fillo de Pablo Iglesias e Irene Montero, que tiveron primeiro os xemelgos Leo e Manuel.
