A exconselleira do Goberno vasco con Patxi López, Isabel Celaá, será a nova ministra de Educación do Executivo de Pedro Sánchez, segundo confirmaron fontes próximas ao presidente.
Celaá, que foi conselleira na época na que o socialista Patxi López foi lehendakari e que é unha persoa moi próxima a Pedro Sánchez, é actualmente presidenta da Comisión de Ética e Garantías do PSOE. Bilbaína de 69 anos, é licenciada en Filosofía, Filoloxía Inglesa e Dereito, é catedrática de Lingua e Literatura Inglesa. Está vinculada á cultura irlandesa, xa que viviu en Belfast e Dublín.
Deputada en varias lexislaturas no Parlamento vasco entre 1998 e 2016, dirixiu o gabinete do conselleiro socialista José Ramón Recalde no departamento de Educación, Universidades e Investigación en 1991. Logo foi viceconselleira de Educación con Fernando Buesa, asasinado por Eta no 2000 no Goberno de coalición entre o PNV e o PSE-EE, entre 1991 e 1995; de 1995 a 1998, dirixiu o gabinete de Ramón Jáuregui (PSE-EE) en Xustiza, Economía, Traballo e Seguridade Social.
Foi conselleira de Educación, Universidades e Investigación con López de lehendakari entre maio de 2009 e outubro de 2012.
Celaá foi elixida presidenta da Comisión de Ética e Garantías do PSOE no congreso federal que en xullo de 2014 ratificou a Pedro Sánchez como secretario xeral en substitución de Alfredo Pérez Rubalcaba e repetiu nese cargo no congreso celebrado en xuño do ano pasado.
