Istambul celebrará novos comicios municipais o día 23 de xuño, despois de que a autoridade electoral haxa aceptado este luns a impugnación presentada polo islamita AKP, o partido do presidente turco Recep Tayyip Erdogan, e anule a vitoria da oposición socialdemócrata.
A Comisión Electoral de Turquía (YSK) decidiu por sete votos a favor e catro en contra aceptar a solicitude de anulación de resultados e repetición de eleccións presentada polo AKP, anulando así a estreita vitoria do socialdemócrata CHP, que acabou con 25 anos de gobernos islamitas na principal cidade turca.
Así o anunciou na rede social Twitter Recep Özel, representante do AKP na Comisión Electoral.
Pola súa banda, Ekrem Imamoglu, alcalde de Istambul polo socialdemócrata CHP, anunciou que fará unha valoración oficial cando a decisión do YSK sexa oficial.
"Nunca perderemos a esperanza, todo sairá ben. eles cometen erros, fan cousas malas, non perderemos a esperanza. Todo estará ben", limitouse a dicir Imamoglu nun vídeo subido a Twitter.
O candidato socialdemócrata gañou as eleccións do 31 de marzo con só 23.000 papeletas de vantaxe, dun total de 8,8 millóns de votos, segundo os resultados preliminares da Comisión Electoral, que serviron para que o pasado día 17 asumise oficialmente o seu cargo de alcalde.
O AKP reclamou primeiro o reconto dos 319.000 votos considerados nulos, logo de todas as papeletas en varios distritos e, finalmente, impugnou o resultado e reclamou a repetición das eleccións.
