Johnson anuncia o peche dos colexios en Reino Unido desde o venres

Advertiu ademais de que os nenos non deberían quedar ao coidado dos seus avós ou de persoas de avanzada idade
Boris Johnson.NEIL HALL (Efe)
photo_camera Boris Johnson.NEIL HALL (Efe)

O primeiro ministro do Reino Unido, Boris Johnson, anunciou este mércores o peche dos colexios do país a partir do venres, ata novo aviso, para frear a expansión do novo coronavirus.

Johnson detallou que os fillos de traballadores esenciais como sanitarios, policías, repartidores de alimentación e asistentes sociais poderán continuar asistindo aos centros.

Advertiu ademais de que os nenos non deberían quedar ao coidado dos seus avós ou de persoas de avanzada idade, "particularmente vulnerables" ao COVID-19, enfermidade da que se detectaron ata agora 2.626 casos no Reino Unido (676 máis que este martes) e deixou 104 mortos.

Antes do anuncio do xefe de Goberno, as rexións de Escocia, Gales e Irlanda do Norte xa avanzaran a súa intención de clausurar os colexios esta semana -unha medida que será inmediata para os alumnos do Úlster-.

O primeiro ministro asegurou que clausurar as escolas ten un "valor limitado á hora de retardar a expansión" do virus

Johnson, que recibiu críticas por unha resposta á epidemia aparentemente menos agresiva que noutros países europeos, asegurou que continuará tratando de tomar as medidas "adecuadas no momento oportuno", seguindo "o mellor consello científico".

O primeiro ministro asegurou que clausurar as escolas ten un "valor limitado á hora de retardar a expansión" do virus, "en parte porque os colexios son contornas moi seguras nesta epidemia, na que os nenos e os mozos son moito menos vulnerables".

Mantelas abertas ata agora reducía a "presión na sanidade pública e outros servizos" e facilitaba que moitos traballadores puidesen continuar desenvolvendo o seu labor, asegurou.

"Sempre dixemos que mantiñamos o noso plan baixo constante revisión. Agora, vendo a curva da enfermidade, debemos aplicarlle algo máis de presión á baixa pechando as escolas", indicou nunha rolda de prensa que ofreceu xunto ao seu conselleiro científico, Patrick Vallance.

"Moita xente está a facer esforzos heroicos por cumprir coas recomendacións que demos"

Cuestionado polos xornalistas, o primeiro ministro rexeitou descartar medidas de illamento máis severas nos próximos días en Londres, onde se rexistraron ao redor dun terzo das mortes polo coronavirus.

O Goberno recomendou á poboación non acudir a pubs, cafeterías, cines e outros lugares públicos onde se concentran grupos de xente, pero non estableceu prohibición algunha polo momento.

"Moita xente está a facer esforzos heroicos por cumprir coas recomendacións que demos. Como dixen, mantemos as nosas decisións nunha revisión constante e non dubidaremos en implementar máis medidas" se son necesarias, afirmou. 

Comentarios