viernes. 27.11.2020 |
El tiempo
viernes. 27.11.2020
El tiempo

Os líderes do 'procés' serán condenados por sedición e malversación

Acusados en el juicio del 'procés'. EMILIO NARANJO (EFE)
Acusados en el juicio del 'procés'. EMILIO NARANJO (EFE)
O tribunal acordou por unanimidade atribuírlles estes delitos e descartar o de rebelión

O tribunal que xulgou a causa do procés acordou por unanimidade condenar aos seus principais responsables por delitos de sedición e de malversación e descartar a acusación de rebelión que formulou a Fiscalía.

Fontes xurídicas confirmaron a Efe esta decisión dos sete maxistrados da Sala do Penal do Supremo que compoñen o tribunal, que inicialmente tiña previsto comunicar o fallo o vindeiro luns 14, aínda que non se descarta que agora a sentenza poida atrasarse.

A falta de que se concreten as penas individualizadas -que irán graduadas en función da participación de cada un dos acusados no procés-, os maxistrados decidiron que non se cumpriron os requisitos para condenar por rebelión.

A súa conclusión achégase ás teses da Avogacía do Estado, que nos seus escritos de acusación sostivo que os feitos ocorridos en Cataluña no outono de 2017 non carrexaron a violencia suficiente para encaixar no tipo de rebelión.

Esa é a diferenza clave entre o delito de rebelión -polo que apostou a Fiscalía- e o de sedición, que castiga con penas de ata 15 anos de prisión a quen, sen estar comprendidos no delito de rebelión, se alcen pública e tumultuariamente para impedir, pola forza ou fóra das vías legais, a aplicación das leis.

Para a Fiscalía, o procés foi un "golpe de estado" que buscou liquidar a Constitución con violencia "suficiente", pero a Avogacía cre que esta non foi "elemento estrutural" do plan.

A Sala tamén decidiu condenar ao exvicepresident Oriol Junqueras e aos exconsellers presos (Joaquim Forn, Josep Rull, Jordi Turull e Raül Romeva) por malversación de caudais públicos. 

Non así aos outros tres acusados, os exconsellers Santi Vila, Carles Mundó e Meritxell Borràs, que previsiblemente serán condenados só por desobediencia, un delito que non carrexa pena de cárcere. 

Os líderes do 'procés' serán condenados por sedición e malversación
comentarios