Un tribunal alemán condenou este martes a doce anos e medio e a doce anos de prisión, respectivamente, a unha muller e ao seu compañeiro por abusar do fillo menor desta e prostituílo en polo menos 60 ocasións durante máis de dous anos, entre 2015 e 2017, a través da rede escura de internet.
A nai, de 48 anos, e o seu compañeiro sentimental, de 39, que permanecerá detido preventivamente unha vez cumprida a pena, confesaran durante o xuízo celebrado na Audiencia Provincial de Friburgo (suroeste) ter abusado, violado e maltratado en repetidas ocasións ao menor, que agora ten 10 anos. Ademais, recoñeceron vender ao menor a través da rede escura de internet a outros homes para abusos sexuais, entre eles un español de 33 anos, que foi condenado este luns a dez anos de prisión e a pagar unha indemnización de 18.000 euros ao neno por danos físicos e morais.
O barcelonés, acusado de violación e abusos sexuais graves e para o que a Fiscalía pedira unha pena de doce anos de prisión, confesou violar en repetidas ocasións ao menor entre setembro de 2016 e agosto de 2017 e pagar por iso. Outras catro persoas, entre elas un cidadán suízo e un soldado do exército alemán, foron condenadas a penas de entre oito e dez anos de prisión e ao pago de indemnizacións de entre 12.500 e 14.000 euros.
Para algúns deles, o xuíz ditou unha detención cautelar posterior ao cumprimento da pena ao existir perigo de reincidencia. Outro home, que non abusara do menor pero do que no marco da investigación se descubriu que violara á súa propia filla, foi condenado a sete anos e tres meses de prisión.
Os abusos cometidos contra o menor foron filmados e intercambiados posteriormente en foros na rede escura. Ademais das violacións, as imaxes mostran as vexacións, malos tratos e insultos dos que foi vítima o neno.
A Fiscalía solicitara para a nai e o padrasto do menor penas de 14 anos e medio e 13 anos e medio, respectivamente.
O xuízo puxo en evidencia, ademais, as lagoas das autoridades e os tribunais de familia, que non intercambiaron ou restaron importancia a informacións decisivas, como as sospeitas de posibles malos tratos expresadas pola escola á que acudía o neno. As autoridades fracasaron así mesmo ao non vixiar ao padrasto do neno, con antecedentes penais por pederastia, e pasar por alto que vivía baixo o mesmo teito cun menor.
